O‘zbekistonda ichimlik suv ta’minoti og‘ir holatdagi 1 545 ta mahalla ichimlik suv bilan ta’minlanadi

“Aholining ichimlik suv ta’minoti va oqova suv xizmatlari bilan ta’minlanganlik darajasini oshirish bo‘yicha qo‘shimcha chora-tadbirlar to‘g‘risida”gi prezident qarori qabul qilindi. Bu haqda Telegram’dagi “Huquqiy axborot” xabar qildi.

Qarorga ko‘ra, 2022—2025-yillarda respublikadagi ichimlik suv ta’minoti og‘ir holatdagi 1 545 mahalla (shundan 2022-yilda 140 ta) ichimlik suv bilan ta’minlanadi. Buning uchun mahalliy budjetlardan jami 444,6 milliard so‘m, shu jumladan joriy yilda 106,3 milliard so‘m mablag‘ ajratiladi. 1 691 ta maktab, 885 ta maktabgacha ta’lim tashkilotlari hamda 377 ta tibbiyot muassasalari ichimlik suv bilan ta’minlanadi. Mazkur tadbirlarni amalga oshirish uchun joriy yilda jami 50 milliard so‘m, 2023 yildan har yili respublika va mahalliy budjetlardan teng ulushlarda 50 milliard so‘mdan, jami 100 milliard so‘m ajratilishi ko‘zda tutilgan.

2022—2024-yillarda respublika bo‘yicha 2660 ta mahallada ichimlik suv tarmoqlari uy xo‘jaligigacha yetkaziladi. Buning uchun “O‘zsuvta’minot” AJ tomonidan 180 milliard so‘m mablag‘ ajratiladi. Shuningdek, qarorga ko‘ra avvalgi yillarda qurilish-montaj ishlari yakunlanmagan yoki foydalanishga topshirilmagan ichimlik va oqova suv obyektlari (17 ta) to‘liq foydalanishga topshiriladi.

2023-yil 1-yanvardan:

• aholiga qiyoslash muddati tugagan suv hisoblagichlarni yangisiga almashtirish “O‘zsuvta’minot” AJ va hududiy suv ta’minoti korxonalarining mablag‘lari hisobidan amalga oshiriladi;
• respublika hududiga texnik talablarga javob bermaydigan suv hisoblagichlarni va ularning qo‘shimcha vositalarini olib kirish hamda o‘rnatish taqiqlanadi;
• ichimlik suv ta’minoti obyektlari foydalanishga tayyor holda topshirilgan taqdirda (o‘lchov uskunalari o‘rnatilib, ichimlik suv uy xo‘jaligigacha yetkazilgan taqdirda) aholining ixtiyoriga ko‘ra davlat xizmatlari markazlari orqali yoki “O‘zsuvta’minot” AJ bilan to‘g‘ridan-to‘g‘ri shartnoma tuzishga va o‘lchov uskunalarini tamg‘alashga ruxsat beriladi.

2023-yildan yuridik shaxs va yuridik shaxs tashkil etmasdan tadbirkorlik faoliyatini amalga oshiruvchi iste’molchilar tomonidan hududiy suv ta’minoti korxonalariga masofadan ma’lumot uzatuvchi zamonaviy suv hisoblagichlar o‘rnatilishi talab etiladi. 2024-yildan masofadan ma’lumot uzatuvchi zamonaviy suv hisoblagichlarni o‘rnatmagan yuridik shaxs va yuridik shaxs tashkil etmasdan tadbirkorlik faoliyatini amalga oshiruvchi iste’molchilarga ichimlik suv ta’minoti va oqova suv xizmatlari uchun suvni hisobga olish uskunasi bilan ta’minlanmagan iste’molchilar sifatida hisob-kitob amalga oshiriladi.

Qarorga ko‘ra, “O‘zsuvta’minot” AJ qoshida Sovuq va issiq suvni hisobga olish uskunalarini (hisoblagichlarni) yechish, qiyoslashdan o‘tkazish hamda o‘rnatish bo‘yicha metrologiya xizmatini va uning hududiy filiallari tashkil etiladi.