2022-yil 5-mayda “O‘zbekiston Respublikasining Soliq kodeksiga qo‘shimcha va o‘zgartishlar kiritish to‘g‘risida”gi O‘RQ-767-son qonun qabul qilindi.
Mazkur qonun bilan Soliq kodeksiga quyidagi qo‘shimcha va o‘zgartishlar kiritildi:
1. 75-moddaga kiritilgan qo‘shimchaga ko‘ra, mol-mulkiga solinadigan soliqni va yer solig‘ini to‘lashdan to‘liq ozod qilish imtiyozlariga ega bo‘lgan yuridik shaxslar ushbu soliqlardan hisoblangan summaning 1 foizini to‘laydi.
Buning natijasida kadastr va soliq organlariga ushbu imtiyozlarga ega bo‘lgan soliq to‘lovchilarni va kadastr hujjatlarini rasmiylashtirmagan ayrim yuridik shaxslarning hisobini yuritish imkoni beriladi
2. 317-modda 7-bandga kiritilgan qo‘shimchaga ko‘ra, bolalarni qo‘llab-quvvatlash jamoat fondiga xayriya qilingan mablag‘lar foyda solig‘i bo‘yicha chegirib tashlanadi.
3. 337 va 467-moddalarga kiritilgan o‘zgartishlarga asosan, 2022-yil 1-iyuldan boshlab tovarlarning (ishlarning, xizmatlarning) elektron savdosini amalga oshiruvchi soliq to‘lovchilarga foyda solig‘i (15 foiz o‘rniga 7,5 foiz) va aylanmadan olinadigan soliqni (4 foiz o‘rniga 2 foiz) kamaytirilgan soliq stavkalari bo‘yicha to‘lash imkoniyati berildi.
4. 380-moddaga kiritilgan o‘zgartishga ko‘ra, bolalikdan nogironligi bo‘lgan hamda I va II guruh nogironligi bo‘lgan shaxslarning daromad solig‘i solinmaydigan mablag‘lari miqdori mehnatga haq to‘lashning eng kam miqdorining 1,41 baravaridan (1 mln 159 ming so‘mdan) 3 baravariga (2 mln 466 ming so‘mga) oshirildi.
5. 428-modda ikkinchi qism o‘n birinchi xatboshiga kiritilgan o‘zgartishga ko‘ra, yangi barpo etilayotgan bog‘lar, tokzorlar va tutzorlar egallagan yer uchastkalarini soliq solishdan ozod etishning imtiyozli davri 3 yildan 5 yilgacha uzaytirildi.
6. 483-modda uchinchi qismning birinchi xatboshisi va to‘qqizinchi qismiga kiritilgan o‘zgartishlarga asosan, ayrim vaqtinchalik imtiyozlarning amal qilish muddati uzaytirildi, jumladan:
- o‘simlik yog‘i, kungaboqar va zig‘ir urug‘i, shuningdek soya danagini olib kirish, shuningdek o‘simlik yog‘ini ishlab chiqarish bo‘yicha aylanmani qo‘shilgan qiymat solig‘idan ozod qilish bo‘yicha imtiyoz muddati 2022-yil 31-dekabrga qadar uzaytirildi;
- go‘shtni (mol va qo‘y go‘shtini), tirik hayvonlarni (molni va qo‘yni) hamda ularni so‘yishdan olingan mahsulotlarni, kartoshkani realizatsiya qilish bo‘yicha aylanma, shuningdek O‘zbekistonga olib kirishda qo‘shilgan qiymat solig‘idan ozod qilish muddati 2022-yil 31-dekabrga qadar uzaytirildi.
2022-yil 1-yanvardan 2031-yil 1-yanvargacha Qoraqalpog‘istonning Mo‘ynoq tumanidagi mahalliy sanoat, qishloq xo‘jaligi va xizmatlar sohalaridagi tadbirkorlik sub’ektlari:
- foyda solig‘ini, aylanmadan olinadigan soliqni, ijtimoiy soliqni va jismoniy shaxslardan olinadigan daromad solig‘ini 1 foiz miqdoridagi soliq stavkalari bo‘yicha to‘laydi;
- yuridik shaxslarning mol-mulkiga solinadigan soliqni, yer solig‘ini va suv resurslaridan foydalanganlik uchun soliqni mazkur soliqlar bo‘yicha hisoblangan summaning 1 foizi miqdoridagi soliq stavkalari bo‘yicha to‘laydi.
Bo‘yalgan matoni, bo‘yalgan gazlamani va tayyor tikuv-trikotaj mahsulotini eksport qiluvchi tadbirkorlik subektlari 2022-yil 1-fevraldan 2025-yil 1-yanvarga qadar ijtimoiy soliqni 1 foiz miqdoridagi soliq stavkasi bo‘yicha to‘laydi.
Bu imtiyoz bo‘yalgan mato, bo‘yalgan gazlama va tayyor tikuv-trikotaj mahsulotini eksport qilishdan olingan tushumi barcha tovarlarni va xizmatlarni realizatsiya qilishdan olingan tushumining kamida 80 foizini tashkil etadigan soliq to‘lovchilarga nisbatan qo‘llaniladi.
Avvalroq O‘zbekistonda 2023-yildan QQS 12 foizgacha tushirilib, keyinchalik yer va mulk soliqlari birlashtirilishi haqida xabar berilgan edi.
Izoh (0)