Qurilish vaziri o‘rinbosari Shukrullo Jahongirov 24-may kuni AOKAda o‘tkazilgan matbuot anjumanida yangi qurilayotgan turar joy binolarining yarim yerto‘la qavatlarida qanday hollarda yashash xonalarini joylashtirish bo‘yicha tushuntirish berdi, deb xabar bermoqda “Daryo” muxbiri.
Uning aytishicha, ko‘p qavatli uy-joylarning yarim yer to‘lalarida yashash joylarini tashkil qilish hamda xizmat ko‘rsatish obyektlarini joylashtirish bo‘yicha bir qator talablar belgilangan.
“Bular, albatta, xorijiy amaliyot, davlat standarti va sanitariya normalari asosida ishlab chiqilgan”, — deydi qurilish vaziri o‘rinbosari.
Shukrullo Jahongirovning ta’kidlashicha, yangi qurilayotgan turar joy binolarining yarim yerto‘la qavatlarida quyidagi hollarda yashash xonalarini joylashtirishga yo‘l qo‘yiladi:
- yerosti suvlari yer sathidan 3 metrdan pastda bo‘lganda;
- yarim yerto‘la (sokol)ning kamida uchdan-bir qismi yer ustida bo‘lganda;
- xonalarini poldan shiftgacha balandligi 2,4 m dan kam bo‘lmaganda;
- muhandislik tizimlar yashash xonalarini inobatga olgan holda joylashtirilganda;
- tashqi devorlari va pollarida issiqlik himoyasi ta’minlanganda;
- 0331-16-son Sanitariya normalari talablari bajarilganda;
- xonalaridan to‘g‘ridan to‘g‘ri tashqariga chiquvchi derazalar bo‘lganda;
- tabiiy yorug‘lik va insolyatsiya darajasi 2 soatdan kam bo‘lmaganda;
- havoning yaxshi aylanishi ta’minlanganda;
- yashash xonadonlaridan evakuatsiya talablari bajarilganda;
- taom tayyorlash uchun elektr plitalardan foydalanilganda.
Izoh (0)