Toshkent viloyatida ikki yoshli qizini aylantirishga olib ketish uchun sobiq rafiqasining oldiga kelgan erkak uni kaltaklab, tan jarohatlari yetkazdi. Bu haqda Telegram’dagi “Nemolchi” loyihasi xabar berdi.
Ma’lum qilinishicha, sobiq er-xotin o‘rtasidagi mojaro bolaning kiyimlari sabab yuzaga kelgan. Erkak sobiq xotinidan qiziga o‘zi olib bergan kiyimlarni kiydirishni talab qilgan. Ayol kiyimlarni qidirishini aytib, eshikni yopayotganida erkak qizchani uning qo‘lidan yulib olib, bir necha bor urgan. Shundan so‘ng, ayolni podyezdga olib chiqib, zinadan itarib yuborgan va podyezd eshigiga urgan.
Ma’lumotlarga ko‘ra, holat yuzasidan gumonlanuvchi 31 yoshli T.B.ga nisbatan Jinoyat kodeksining 109-moddasi (qasddan badanga yengil shikast yetkazish) bilan jinoyat ishi qo‘zg‘atilgan.
Ushbu moddaga ko‘ra, sog‘liqning qisqa vaqt, ya’ni olti kundan ortiq, ammo yigirma bir kundan ko‘p bo‘lmagan muddatga yomonlashuviga yoki umumiy mehnat qobiliyatining uncha uzoq bo‘lmagan muddatga yo‘qotilishiga sabab bo‘lgan qasddan badanga yengil shikast yetkazish — bazaviy hisoblash miqdorining 25 baravaridan 50 baravarigacha miqdorda jarima yoki 2 yilgacha axloq tuzatish ishlari yoxud 1 yilgacha ozodlikni cheklash yoki bir yilgacha ozodlikdan mahrum qilish bilan jazolanadi.
Avvalroq Andijonda 2022-yilning to‘rt oyi davomida 1221 nafar ayolga himoya orderi berilgani, Qashqadaryoda erkak ayoli va o‘g‘lini o‘zining 3 nafar aka-ukasi bilan birgalashib kaltaklagani to‘g‘risida xabar berilgandi.
Izoh (0)