Jahon banki guruhi O‘zbekiston bilan 2022–2026-yillarga mo‘ljallangan hamkorlikning yangi dasturini qabul qildi.
1992–1993-yillarda O‘zbekiston Jahon banki guruhi tarkibidagi tashkilotlarga a’zo bo‘ldi. Yangi hamkorlik dasturi Jahon banki va hukumatning birgalikdagi 30 yillik tajribasiga asoslanadi.
2017-yildan beri Jahon banki rasmiylar bilan yaqin hamkorlikda ishlamoqda, buni moliyalashtirish, tahliliy xizmatlar va texnik yordamning misli ko‘rilmagan ko‘lami, xilma-xilligi va dinamizmi tasdiqlaydi.
Jahon banki va Xalqaro moliya korporatsiyasi (XMK) hukumatga O‘zbekistonda iqtisodiyot, jamiyat va xususiy sektorni o‘zgartirish va modernizatsiya qilish bo‘yicha dadil islohotlarni amalga oshirishda yordam berdi.
Bu bilan ular mamlakatning yangi tarixida ko‘plab muhim marralarni qo‘lga kiritishiga hissa qo‘shdi.
Jahon banki tomonidan qo‘llab-quvvatlangan qishloq xo‘jaligidagi islohotlar tufayli paxta sohasida majburiy mehnatga chek qo‘yish eng muhim muvaffaqiyatlardan biri bo‘ldi.
Hamkorlik O‘zbekistonning inklyuziv va barqaror bozor iqtisodiyotiga o‘tish jarayonini jadallashtirishga qaratilgan uchta strategik maqsadga yo‘naltiriladi:
- xususiy sektorda inklyuziv bandlikni oshirish;
- inson kapitalini rivojlantirish;
- yashil iqtisodiy o‘sish orqali farovonlik va barqaror rivojlanishni oshirish.
Hamkorlik dasturi mavjud muammolar va O‘zbekistonni rivojlantirishning potensial imkoniyatlarini har tomonlama tahlil qilish asosida ishlab chiqilgan. U mamlakatdagi ijtimoiy-iqtisodiy vaziyatni kompleks diagnostika qilish doirasida o‘tkazildi.
Shuningdek, hukumat va hududiy hokimiyat organlari, fuqarolik jamiyati, xususiy sektor, ilmiy doiralar va rivojlanish bo‘yicha xalqaro hamkorlar vakillari bilan faol maslahatlashuvlar natijalari ham hisobga olindi.
O‘zbekiston bilan so‘nggi besh yildagi muvaffaqiyatli hamkorligimiz va boshqa o‘tish davridagi iqtisodiyotdagi transformatsiyalarni qo‘llab-quvvatlash bo‘yicha tajribamizga tayangan holda hamkorlik hukumatga bozor islohotlarining keyingi avlodini amalga oshirishda yordam beradi, — dedi Jahon banki mintaqaviy direktori Tatyana Proskuryakova.Ayni paytda Jahon bankining O‘zbekistondagi portfeliga turli ijtimoiy-iqtisodiy islohotlarni qo‘llab-quvvatlovchi 28 ta loyiha kiritilgan bo‘lib, ularning moliyaviy majburiyatlari umumiy qiymati 5,26 mlrd dollarni tashkil etadi.
Avvalroq O‘zbekistonda xususiy biznes o‘sishi va kengayishi uchun joy yetishmayotgani haqida xabar berilgan edi.
Izoh (0)