2022 йил 5 майда «Ўзбекистон Республикасининг Солиқ кодексига қўшимча ва ўзгартишлар киритиш тўғрисида»ги ЎRQ-767-сон қонун қабул қилинди.
Мазкур қонун билан Солиқ кодексига қуйидаги қўшимча ва ўзгартишлар киритилди:
1. 75-моддага киритилган қўшимчага кўра, мол-мулкига солинадиган солиқни ва ер солиғини тўлашдан тўлиқ озод қилиш имтиёзларига эга бўлган юридик шахслар ушбу солиқлардан ҳисобланган сумманинг 1 фоизини тўлайди.
Бунинг натижасида кадастр ва солиқ органларига ушбу имтиёзларга эга бўлган солиқ тўловчиларни ва кадастр ҳужжатларини расмийлаштирмаган айрим юридик шахсларнинг ҳисобини юритиш имкони берилади
2. 317-модда 7-бандга киритилган қўшимчага кўра, болаларни қўллаб-қувватлаш жамоат фондига хайрия қилинган маблағлар фойда солиғи бўйича чегириб ташланади.
3. 337 ва 467-моддаларга киритилган ўзгартишларга асосан, 2022 йил 1 июлдан бошлаб товарларнинг (ишларнинг, хизматларнинг) электрон савдосини амалга оширувчи солиқ тўловчиларга фойда солиғи (15 фоиз ўрнига 7,5 фоиз) ва айланмадан олинадиган солиқни (4 фоиз ўрнига 2 фоиз) камайтирилган солиқ ставкалари бўйича тўлаш имконияти берилди.
4. 380-моддага киритилган ўзгартишга кўра, болаликдан ногиронлиги бўлган ҳамда I ва II гуруҳ ногиронлиги бўлган шахсларнинг даромад солиғи солинмайдиган маблағлари миқдори меҳнатга ҳақ тўлашнинг энг кам миқдорининг 1,41 бараваридан (1 млн 159 минг сўмдан) 3 бараварига (2 млн 466 минг сўмга) оширилди.
5. 428-модда иккинчи қисм ўн биринчи хатбошига киритилган ўзгартишга кўра, янги барпо этилаётган боғлар, токзорлар ва тутзорлар эгаллаган ер участкаларини солиқ солишдан озод этишнинг имтиёзли даври 3 йилдан 5 йилгача узайтирилди.
6. 483-модда учинчи қисмнинг биринчи хатбошиси ва тўққизинчи қисмига киритилган ўзгартишларга асосан, айрим вақтинчалик имтиёзларнинг амал қилиш муддати узайтирилди, жумладан:
- ўсимлик ёғи, кунгабоқар ва зиғир уруғи, шунингдек соя данагини олиб кириш, шунингдек ўсимлик ёғини ишлаб чиқариш бўйича айланмани қўшилган қиймат солиғидан озод қилиш бўйича имтиёз муддати 2022 йил 31 декабрга қадар узайтирилди;
- гўштни (мол ва қўй гўштини), тирик ҳайвонларни (молни ва қўйни) ҳамда уларни сўйишдан олинган маҳсулотларни, картошкани реализация қилиш бўйича айланма, шунингдек Ўзбекистонга олиб киришда қўшилган қиймат солиғидан озод қилиш муддати 2022 йил 31 декабрга қадар узайтирилди.
2022 йил 1 январдан 2031 йил 1 январгача Қорақалпоғистоннинг Мўйноқ туманидаги маҳаллий саноат, қишлоқ хўжалиги ва хизматлар соҳаларидаги тадбиркорлик субъэктлари:
- фойда солиғини, айланмадан олинадиган солиқни, ижтимоий солиқни ва жисмоний шахслардан олинадиган даромад солиғини 1 фоиз миқдоридаги солиқ ставкалари бўйича тўлайди;
- юридик шахсларнинг мол-мулкига солинадиган солиқни, ер солиғини ва сув ресурсларидан фойдаланганлик учун солиқни мазкур солиқлар бўйича ҳисобланган сумманинг 1 фоизи миқдоридаги солиқ ставкалари бўйича тўлайди.
Бўялган матони, бўялган газламани ва тайёр тикув-трикотаж маҳсулотини экспорт қилувчи тадбиркорлик субектлари 2022 йил 1 февралдан 2025 йил 1 январга қадар ижтимоий солиқни 1 фоиз миқдоридаги солиқ ставкаси бўйича тўлайди.
Бу имтиёз бўялган мато, бўялган газлама ва тайёр тикув-трикотаж маҳсулотини экспорт қилишдан олинган тушуми барча товарларни ва хизматларни реализация қилишдан олинган тушумининг камида 80 фоизини ташкил этадиган солиқ тўловчиларга нисбатан қўлланилади.
Аввалроқ Ўзбекистонда 2023 йилдан ҚҚС 12 фоизгача туширилиб, кейинчалик ер ва мулк солиқлари бирлаштирилиши ҳақида хабар берилган эди.
Изоҳ (0)