Lego katalogida 400 yevro qiymatida Technic seriyasiga kiruvchi yangi konstruktor paydo bo‘ldi. 3778 ta detaldan iborat jamlanmadan Ferrari Daytona SP3 superkari nusxasini yig‘ish mumkin, deb xabar beradi Motor.
Ushbu o‘yinchoq modelning uzatmalar qutisi ishlaydi, 12 silindrli dvigateli porshenlari qimirlaydi va eshiklari “kapalak qanoti” ko‘rinishida ochiladi. Shuningdek, modelga laklangan kumushrang g‘ildirak diskalari o‘rnatilgan va saloni ham mayda detallariga qadar ishlangan.
Yig‘ilgan avtomobil originalidan farq qilmaydi, biroq texnologiya nuqtai nazaridan haqiqiy superkar ancha qiziqroq. Masalan, italiyaliklarning so‘zlariga ko‘ra, ular ayrim yechimlardan LaFerrari supergibridi davridan buyon mashinalarida foydalanmaydi. Xususan, kompozitlardan ishlangan shassi elementlarida.
Daytona SP3 812 Superfast’ning 6,5 litrli V12 dvigateli yordamida harakatga keladi. Motor 840 ot kuchi va 697 Nm aylanuvchi momentni taqdim etadi va yetti pog‘onali F1 “robot” uzatmalar qutisi yordamida boshqariladi.
12 silindrli dvigatelga ega Ferrari’ning o‘rta seriyali motori birinchi bor burilishlarni amalga oshirishda maksimal samaradorlikni ta’minlash uchun tormoz tizimidagi bosimni boshqaradigan FDE (Ferrari Dynamic Enhancer) jamlanmasiga ega bo‘lgan.
Superkar soatiga 100 kilometr tezlikka 2,85 soniyada erishadi, 200 kilometr/soat uchun 7,4 soniya kifoya qiladi. Maksimal tezligi soatiga 340 kilometrdan oshadi. Model narxi 2 million yevroni tashkil etadi, tiraji — 599 nusxa.
Eslatib o‘tamiz, 2021-yilning iyun oyida Lego kompaniyasi 400 mingta konstruktor detallaridan tarkib topgan to‘liq o‘lchamli Lamborghini Sian giperkarini taqdim etgandi. Uni yaratish ustida 15 nafar mutaxassis 8660 soat ish olib borgan. 1:1 masshtabdagi o‘yinchoq giperkar Lamborghini Sian FKP 37 modeli dizaynini takrorlaydi.
Izoh (0)