2019-yilda Lamborghini V12 Vision Gran Turismo — Gran Turismo Sport videoo‘yinida virtual reallikka qo‘shish uchun maxsus yaratilgan bir o‘rindiqli giperkar taqdimoti o‘tkazilgandi. Aslida noodatiy mashina mavjud emas, biroq bu Italiya markasi ishqibozlariga virtual giperkarni o‘z kuchlari bilan yaratishga to‘sqinlik qilmadi, deb xabar beradi Motor.
Lamborghini V12 Vision Gran Turismo’ni haqiqatga aylantirishga ustaning o‘g‘li giperkarga qiziqqani sabab bo‘lgan — o‘yinchoq model markaning yosh ishqibozining sevimli ovunchog‘iga aylangani sabab ota farzandi uchun Gran Turismo Sport’dagi mashinani yasashga qaror qilgan.
Avtomobil kuzovini yasashda bir necha turdagi daraxt yog‘ochidan foydalanilib, qo‘lda qayta ishlov berilgan. Panellar “eshiklarni” ochishga xizmat qiladigan elektr uzatmalar bilan jihozlangan po‘lat karkasga qotirilgan, elektromotor ham unga o‘rnatilgan.
Yog‘ochdan ishlangan Lamborghini V12 Vision Gran Turismo mustaqil harakatlanishga qodir. Model to‘liq boshqariluvchan — hatto ruli yog‘ochdan ishlangan — kuzov va g‘ildiraklaridagi yorug‘lik diodlar qayerga burilishni ko‘rsatadi. Usta ushbu noyob giperkarni yasashga 96 kun sarflagan.
Avvalroq AQSHda ota o‘g‘li uchun o‘zining Ford Mustang Shelby GT500 avtomobilining mitti nusxasini sovg‘a qilgandi. Undan oldinroq esa o‘yinchoq pulemyot va tutun chiqaruvchi qurilmaga ega bolalar Aston Martin’i taqdim etilgani, Toyota vodorodda harakatlanuvchi o‘yinchoq Mirai’ni yasagani to‘g‘risida xabar berilgandi.
Izoh (0)