Kaliforniyaning Monterey shahrida o‘tkaziladigan Broad Arrow Auctions auksionida Shon Konneriga tegishli bo‘lgan Aston Martin DB5 kimoshdiga qo‘yiladi. Mashhur kinoaktyorning avtomobili 1,4—1,8 million dollarga baholanmoqda. Shassi raqami DB5/1681/R, kuzov rangi Snow Shadow Grey, saloni qizil hamda kapoti ostidan 4,0 litrli V6 motor o‘rin olgan avtomobil yaxshi holatda saqlangan, deb xabar beradi Motor.
2020-yilning 31-oktabr kuni Jeyms Bond roli orqali dunyoga tanilgan shotlandiyalik aktyor Shon Konneri vafot etgani ma’lum bo‘lgandi. Aktyor Shveysariyadagi uyi va mashhur Aston Martin DB5 avtomobili saqlangan garajini oilasiga qoldirib, 90 yoshida olamdan o‘tgan.
Avtomobil 1964-yilda Artur Uayt ismli shaxs uchun yasalib, unga yetkazib berilgani ma’lum. Mashina 2018-yilda Konneri Richard Uillyams tomonidan Aston Martin RS Williams kompaniyasi orqali sotib olguniga qadar Buyuk Britaniyada saqlangan.
Mazkur nusxa besh pog‘onali ZF mexanik uzatmalar qutisi bilan jihozlangan va dastlab qora salonga ega California Sage Blue ko‘k rangida bo‘lgan. Konneri avtomobilning tashqi ko‘rinishi josus 007 ning mashinasi rangida bo‘lishini xohlagani sabab, u Snow Shadow Grey kumush rangiga bo‘yalgan va saloni qizil charm bilan qoplangan.
Bundan oldin 2002-yilda katta ekran yuzini ko‘rgan “Halok bo‘l, lekin hozir emas” filmida Jeyms Bond rolini ijro etgan aktyor Pirs Brosnan qanday qilib Aston Martin’ni o‘ziga superkar sovg‘a qilishga ko‘ndirganini so‘zlab bergandi.
Izoh (0)