Markaziy Osiyoda birinchi marta Metaverse’da o‘zbek rassomining virtual galereyasi yaratildi

19-may kuni Toshkent viloyatida bo‘lib o‘tgan Markaziy Osiyo yoshlar forumida o‘zbek rassomi Lekim Ibragimovning Markaziy Osiyodagi birinchi virtual galereyasini taqdim etildi. Bu haqda Skywin kompaniyasi “Daryo”ga ma’lum qildi. 

Kompaniya birinchi bo‘lib Lekim Ibragimov brendini NFT bozoriga olib chiqdi.

Virtual reallik texnologiyalari, Metaverse va NFT butun dunyo kelajagini ifodalovchi yangi atamalarga aylanmoqda.

“Metaverse’dagi Lekim Ibragimov galereyasi” loyihasi O‘zbekistonning boy madaniyati va san’ati yangi reallik texnologiyalari va imkoniyatlari bilan abadiy yashashi mumkinligini ko‘rsatib beradi.

Lekim Ibragimovning Metaverse’da yaratilgan galereyasi Markaziy Osiyodagi birinchi virtual galereya bo‘lib, O‘zbekistonning xalqaro maydondagi obro‘-e’tiborini yuksaltirishda ulkan o‘rin tutuvchi keng miqyosdagi loyihadir. 

O‘zbek rassomining galereyasi Metaverse’ning jahon platformalariga birinchi bo‘lib kirdi va Lekim Ibragimov brendi NFT hamjamiyatida birinchilardan bo‘lib o‘z o‘rnini egallamoqda.

Loyihaning maqsadi yangi erada bir xonadan chiqmasdan turib iste’dodli rassomning san’at asarlari bilan tanishish, uning ustaxonasiga nazar tashlash, dunyoning turli burchaklaridan bo`lgan san’at ixlosmandlari bilan uchrashish va rassomning suratlari asosida yaratilgan NFTlarni xarid qilish mumkinligini namoyish etishdir.

Taqdimot mehmonlari va OAV vakillari galereyaning birinchi mehmonlari bo‘lish va virtual reallik texnologiyalarining ishonib bo`lmas imkoniyatlariga o‘zlari guvoh bo`lish imkoniga ega bo‘ldi. Galereyani loyiha ijodkorlari taqdim etishdi.

Shuningdek, yaqinda Yoshlar ijod saroyida Yoshlar ishlari agentligi va O‘zbekiston Milliy media assotsiatsiyasi  bilan hamkorlikda Skywin jamoasi O‘zbekistonni jahon virtual hamjamiyatida ommalashtirishga qaratilgan yangi raqamli loyihalarning asosiy taqdimotini o‘tkazishni rejalashtirmoqda.