“Daryo”ga Samarqand viloyatining Payariq tumani “Olmazor” mahallasida yashovchi fuqaro Asqar G‘ofurov murojaat yo‘llab, 2022-yilning 29-aprel kuni qizi Nilufar Umrzoqova Samarqand shahridagi 1-son shahar tug‘uruqxonasida kesar kesish yo‘li bilan farzandli bo‘lganini ma’lum qilgan. Biroq, operatsiyadan so‘ng 22 yoshli qizining sog‘ligi yomonlashgani, shifokorlar xatosi sabab oradan besh kun o‘tib qayta operatsiya qilgani-yu, endilikda farzand ko‘rolmasligini ma’lum qilgan.
“Daryo” muxbiri voqea tafsilotlarini o‘rgandi.
Ma’lum bo‘lishicha, 2000-yilda tug‘ilgan Nilufar Umrzoqova 2022-yilning 29-aprel kuni soat 11:20 da tug‘uruqxonaga qabul qilingan. Tug‘uruqning birinchi davri bo‘lgan ayolda soat 18:30 atrofida og‘riq yo‘qolgan. Shu sababli shifokorlar ayolni kesarcha kesish yo‘li bilan tug‘dirgan.
“29-aprelda operatsiya bo‘ldim. O‘sha kuni yaxshi edim. Keyingi kuni ham kun bo‘yi yaxshi yurgandim. Kechqurun sog‘lig‘im yomonlasha boshladi. Kechasi bilan isitma qildim. Haroratim 40 gradusdan pastga tushmadi. Hamshirani chaqirgan edim, ukol qilib ketdi. Shundan so‘ng haroratim tushdi. Keyingi kuni yana sog‘lig‘im yomonlashdi. Uydagilarimni chaqirdim. Ancha ukol-dori yozib berdi. O‘shani qilishdi. Baribir sog‘lig‘imda o‘zgarish bo‘lmadi. Keyingi kuni yana boshqa dori yozib berdi. O‘shani olganimdan so‘ng yaxshi bo‘lib qoldim. Ammo ketaman degan kunim tana haroratim yana 40 gradusga ko‘tarilib, umuman tushmay qo‘ydi. 5-may kuni yana qayta operatsiya qilishdi. Menga nima bo‘ldi desam, aytishmadi. Keyin tushdan so‘ng birdan operatsiya qilishdi. Nega operatsiya qilyapti, deb so‘raganimda ichingda suv to‘planib qolgan deyishdi. Qolganini bilmayman” , — deydi Nilufar Umrzoqova.
Akusher-ginekolog Dilovar Hamdamova birinchi operatsiya 29-aprel kuni soat 19:00 da amalga oshirilganligini aytmoqda.
“O‘sha kuni navbatchilik vaqtimda ayolni qabul qilib oldim. Soat 18:30 da ayolning tug‘urug‘ida asoratlar kuzatildi. Chanoq bosh nomutanosibligi kuzatilganligi uchun kesarcha kesish operatsiyasini o‘tkazishga qaror qildik. Navbatchi vrachlar bilan birgalikda ko‘rik o‘tkazdik. Ayolning qarindoshlaridan, o‘zidan operatsiyaga rozilik xati oldik. Ayolga tug‘uruq jarayonida kuzatiladigan asoratlar haqida tushuntirdik. Shundan so‘ng rozilik xatini yozib berdi. 29-aprel kuni soat 19:00 da kesarcha kesish operatsiyasini o‘tkazdik. 3 kilo 610 gramm o‘g‘il jinsli chaqaloq tug‘ildi. Operatsiyadan keyin bemorda uch sutka davomida tana harorati ko‘tarilishi kuzatilgan. Ayolning issig‘i ko‘tarilganligi sababli protokol bo‘yicha intensiv terapiya va antibakterial terapiyani o‘tkazdik. 5-may kuni soat 12:00 da ayolda konsilum o‘tkazilib, bachadon subinvalutsiyasi, choklar nosozligi tashxisi qo‘yildi va ayol operatsiyaga olindi. Ayolga yettinchi sutkada chaqalog‘i bilan qoniqarli ahvolda uyiga javob berildi”, — deydi 1-son tug‘uruq majmuasi xasta homiladorlar bo‘limi akusher-ginekolog vrachi Dilovar Hamdamova.
Nilufar Umrzoqovaning onasi Feruza G‘ofurovaning ta’kidlashicha, operatsiyadan keyingi holat haqida hali qizining xabari yo‘q.
“Birinchi kuni o‘zlari olib ketishdi. Operatsiya emas, o‘zi tug‘ishga harakat qiladi, deyishdi. Men bormadim. O‘zlari hamisha tug‘dirib yotishibdi-ku. Telefonda tinimsiz aloqada bo‘lib turdim. Tug‘ganidan so‘ng ertasi kuni bordim. Qizim yaxshiman deb aytdi. Birinchi kunida oyoqlarida, keyingi kunlarda yuzida shish bor edi. Borib ko‘rdim, yana yaxshiman dedi. Ozgina gaplashdik, ichkariga kirib ketdi. Keyingi kunlarda ham dadasi bilan bordik. Qorni shishgan, qizim esa oshqozoni dam bo‘layotganligini aytdi. Parhezdaman, sho‘rva ichmayman deb janjal qildi. Keyin nega bunday shish bo‘ladi desam, bilmasam dedi. Shifokorlar parhez qilib turishini aytgan. Xullas, qorin shishi qaytmadi. Aya, terlab ketyapman, dedi. Borganimizda ham terlab ketayotgandi. Do‘xtirlar bilan gaplashib ko‘rdim. Suv to‘plangan yoki qon to‘plangan, dedi. Men tinimsiz UZIga tushirib turganman, holati yaxshi edi. Loyishga, Chelakka va Samarqand shahrida UZIga tushirganman. Hozir nevaramning ahvoli yaxshi, ishtahasi zo‘r”, — deydi Feruza G‘ofurova.
Nilufar Umrzoqovaning otasi Asqar G‘ofurovni qizining olti sutka o‘tib, qayta operatsiya qilinishi sababi qiziqtirmoqda.
“Insonning hayoti ustidan tavakkalchilik qilish to‘g‘ri emas. Olti sutka o‘tib, qayta operatsiya qilinishiga nima sabab bo‘lgan? Bu holatni hech qaysi ota-onaga ravo ko‘rmayman. Tajribasi yetmasa, bilimi yetmasa, nima qiladi unda odamlarni aldab? Prezidentimiz jahoning eng yaxshi, zamonaviy apparatlarini olib kelib qo‘yibdi. Shularga tayangan holda ish ko‘rish kerak-da. Oxirgi daqiqalarda ulgurib qolishdi. Haliyam vijdonli shifokorlar bor ekan shularning sa’y-harakati bilan qizimning hayoti saqlab qolindi”, — deydi qizning otasi.
1-son shahar tug‘uruqxonasi vrachi Guljannat Isroilova tug‘uruqdan oldin ayolning ahvoli yaxshi bo‘lganini, uning sog‘lig‘ida muammo bo‘lmaganini aytmoqda.
“Tug‘uruqdan so‘ng ayolda uch sutka yallig‘lanish jarayonlari kechganligi sababli tana harorati ko‘tarilgan. 5-may kuni shu tashxisga asosan qayta operatsiya o‘tkazilib, 11-may kuni ayol qoniqarli ahvolda bolasi bilan uyiga qaytarilgan. Ayolda shishlar bo‘lganligi sababli tumandagi shifokorlarga ishonmaymiz, degan ma’noda shaharga kelishgan. Kelinning qaynotasi tomoni tanishlarimiz bo‘ladi. Bemor har hafta shanba kuni uyimga qaynonasi bilan borib, ko‘rikdan o‘tib turardi. Siz shu yerda ishlaysiz deb bu yerga kelishgandi. Undan keyin ham borib ko‘rdim. Ahvoli yaxshi”, — deydi 3-son akusher-genikologiya kafedrasi assistenti, 1-son shahar tug‘uruqxonasi vrachi Guljannat Isroilova.
Shifokorlarning qo‘shimcha qilishicha, ayolda tug‘ishdan oldin qog‘onoq suvlari ketgan. Homila ham chanoqqa nomutanosib kelgan. Chanoq bosh disproparsiyasi kuzatilganligi sababli Nilufar Umrzoqova operatsiya yo‘li bilan tug‘gan.
Murojaatchi Asqar G‘ofurov shifokorlar xatosi sabab qizi shu ahvolga tushganini, kelajakda boshqa farzand ko‘rolmasligini aytib, barchani hushyor bo‘lishga, shifokorlar mas’uliyat bilan ishlashi uchun ham bu masala yakuniga yetishi kerak degan fikrda.
Samarqand viloyat sog‘liqni saqlash boshqarmasi Nilufar Umrzoqova bilan bog‘liq holatga oydinlik kiritish maqsadida maxsus ishchi guruh tashkil qilganligini ma’lum qildi. Holat yuzasidan yakuniy xulosa ekspertiza xulosasi va ishchi guruh o‘rganishlaridan so‘ng e’lon qilinadi.
Izoh (0)