Toshkent shahri Uchtepa tumanida sug‘urta polislari pulini o‘zlashtirgan sobiq direktor va uning sherigi aniqlandi. Bu haqda Iqtisodiy jinoyatlarga qarshi kurashish departamenti xabar qildi.
Qayd etilishicha, Bosh prokuratura huzuridagi departamentning Uchtepa tuman bo‘limi tomonidan tadbirkorlik subyektlarini himoya qilish yuzasidan tergovga qadar tekshiruv o‘tkazilgan. Unda “H.S.” AJ Toshkent viloyati filialining sobiq direktori M.O. va sug‘urta agenti S.I. qat’iy hisobda turuvchi umumiy qiymati 725,3 million so‘mlik 7 775 dona sug‘urta polisini mijozlarga sotib, savdodan tushgan naqd pul mablag‘larni talon-toroj qilgani aniqlangan.
Shuningdek, mazkur sug‘urta polislaridan 14 tasi yo‘l harakati hodisasi sodir etilganidan keyin rasmiylashtirilib, fuqarolarga jami 315,4 million so‘m sug‘urta qoplamasi noqonuniy to‘lab berilgan. Buning natijasida jamiyat manfaatlariga jami 1 milliard 40,7 million so‘m zarar yetkazilgan.
Holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) bilan jinoyat ishi qo‘zg‘atilgan. Hozirda tergov harakatlari o‘tkazilmoqda.
Mavzuga doir:
- Toshkentda kredit qarzdorligini yopish maqsadida soxta tadbirkorlik faoliyati bilan shug‘ullangan fuqarolar aniqlandi
- Navoiyda XTV va tadbirkorlik subyekti mas’ullari sport anjomlarini 787 mln so‘m qimmatga sotib olgani aniqlandi
- Qibrayda fuqaro va bank mas’ul xodimi 1 mlrd so‘m kredit mablag‘ini talon-toroj qildi
Izoh (0)