Марказий Осиёда биринчи марта Metaverse’да ўзбек рассомининг виртуал галереяси яратилди

19 май куни Тошкент вилоятида бўлиб ўтган Марказий Осиё ёшлар форумида ўзбек рассоми Леким Ибрагимовнинг Марказий Осиёдаги биринчи виртуал галереясини тақдим этилди. Бу ҳақда Skywin компанияси «Дарё»га маълум қилди. 

Компания биринчи бўлиб Леким Ибрагимов брендини NFT бозорига олиб чиқди.

Виртуал реаллик технологиялари, Metaverse ва NFT бутун дунё келажагини ифодаловчи янги атамаларга айланмоқда.

«Metaverse’даги Леким Ибрагимов галереяси» лойиҳаси Ўзбекистоннинг бой маданияти ва санъати янги реаллик технологиялари ва имкониятлари билан абадий яшаши мумкинлигини кўрсатиб беради.

Леким Ибрагимовнинг Metaverse’да яратилган галереяси Марказий Осиёдаги биринчи виртуал галерея бўлиб, Ўзбекистоннинг халқаро майдондаги обрў-эътиборини юксалтиришда улкан ўрин тутувчи кенг миқёсдаги лойиҳадир. 

Ўзбек рассомининг галереяси Metaverse’нинг жаҳон платформаларига биринчи бўлиб кирди ва Леким Ибрагимов бренди NFT ҳамжамиятида биринчилардан бўлиб ўз ўрнини эгалламоқда.

Лойиҳанинг мақсади янги эрада бир хонадан чиқмасдан туриб истеъдодли рассомнинг санъат асарлари билан танишиш, унинг устахонасига назар ташлаш, дунёнинг турли бурчакларидан бо`лган санъат ихлосмандлари билан учрашиш ва рассомнинг суратлари асосида яратилган NFTларни харид қилиш мумкинлигини намойиш этишдир.

Тақдимот меҳмонлари ва ОАВ вакиллари галереянинг биринчи меҳмонлари бўлиш ва виртуал реаллик технологияларининг ишониб бо`лмас имкониятларига ўзлари гувоҳ бо`лиш имконига эга бўлди. Галереяни лойиҳа ижодкорлари тақдим этишди.

Шунингдек, яқинда Ёшлар ижод саройида Ёшлар ишлари агентлиги ва Ўзбекистон Миллий медиа ассоциацияси  билан ҳамкорликда Skywin жамоаси Ўзбекистонни жаҳон виртуал ҳамжамиятида оммалаштиришга қаратилган янги рақамли лойиҳаларнинг асосий тақдимотини ўтказишни режалаштирмоқда.