“Bemorlarga 250 dan ortiq sun’iy oshqozon o‘rnatildi” — mutaxassis noyob jarrohlik amaliyoti va saratonning davosi borligi haqida

O‘zbekistonda 2001-yildan beri 250 nafardan ortiq bemorga sun’iy oshqozon o‘rnatilgan. Bu haqda Innovatsiya vazirligi o‘tkazgan “Tibbiyot ilm-fani kunlari” tadbirida Respublika onkologiya markazi direktor o‘rinbosari Abrorbek Yusufbekov ma’lum qildi, deya xabar bermoqda “Daryo” muxbiri.

Abrorbek Yusufbekovning aytishicha, 2001-yilda onkologiya markazi tomonidan odam organizmi uchun sun’iy oshqozon yaratilgan va birinchi operatsiya amalga oshirilgan.

“Saratonning turlari juda ko‘p. Hozirda bu kasallikni 100 foiz davolash imkoniyatlari mavjud. Saratondan davolanib, 20-30 yildan beri yashayotgan odamlar bor. Saraton kasalligining 4 ta darajasi bo‘ladi. 1-2 darajadagi bemorlar davolansa, tuzalish ehtimoli yuqori. Masalan, sut bezi saratoni kasalligi bilan davolangan bemorlarning 10 yil yashash ko‘rsatgichi 98 foizni tashkil qiladi. Bachadon bo‘yni saratonida nur va kimyo terapiyalari qilinganda, bemorlarning 10-15 yil yashash ko‘rsatgichi bor.

Bizning onkologiya markazimizda sun’iy oshqozon yaratilgan va unga patent olingan. 2001-yilda shunday uskunani o‘rnatish uchun birinchi operatsiya bajarilgan. Shunday oshqozon qo‘yilgan bemorlar orasida o‘zimning kuzatuvimda bo‘lib, 17 yildan beri yashab kelayotganlari bor. Bugungi kunda Rossiyada ham shunday operatsiyalar qilinyapti. Ammo bunday oshqozonning xorijiy analoglari juda ham kam. Bu texnologiya hozirga qadar yaxshi samara berib kelmoqda”, – dedi markaz vakili.

Abrorbek Yusufbekovning qo‘shimcha qilishicha, ayni paytda sun’iy oshqozon bemorning ko‘krak qafasiga ham o‘rnatilmoqda.

“Sun’iy oshqozon oldin faqat qorin bo‘shlig‘ida qo‘yilgan bo‘lsa, hozirgi kunda buni ko‘krak qafasiga ham bir qismini olib chiqib o‘rnatmoqdamiz. Ya’ni qizil o‘ngach saratonida, qizil o‘ngachning pastki qismini olib tashlab, ingichka ichakdan sun’iy oshqozon yasab o‘rnatilmoqda. Shu paytgacha 250 nafardan ortiq bemorga sun’iy oshqozonlar o‘rnatilgan. Natijalar kasallikning darajasiga qarab bo‘ladi. Saratonning 1-2 bosqichidagi bemorlar albatta yashaydi. Buning uchun to‘g‘ri tashxis qo‘yish, to‘g‘ri operatsiya qilish va davolash kerak bo‘ladi”, – dedi mutaxassis.