“O‘zining sohasida omadsiz bo‘lgan odamlar emlash haqida boshqalarning fikrini o‘zgartirishga harakat qilyapti” — Nurmat Otabekov

O‘zbekistonda koronavirus bo‘yicha vaziyat murakkablashish ehtimoli bor. Bu haqda 23-may kuni SSV vakillari bilan o‘tkazilgan matbuot anjumanida Sanitariya-epidemiologik osoyishtalik va jamoat salomatligi xizmati boshlig‘i o‘rinbosari Nurmat Otabekov aytib o‘tdi, deb xabar berdi “Daryo” muxbiri.

Mutaxassisning ta’kidlashicha, koronavirus bir kishida bo‘lsa ham aniqlanyaptimi, demak, u boshqa odamni kasallantirishi mumkin.

Kasallikni dastlabki aniqlangan vaqtida hisob-kitoblar qilganimizda ma’lum bo‘lgandiki, bir kishi 240 kishini kasallantirishi mumkin. O‘sha kasallik boshlanishi, avj olishi va tugashi arafasida. Shu nuqtayi nazardan O‘zbekistonda vaziyat barqaror. Endi epidemiologiya fanida shunday bir jumla bor, epidemiya kechayotgan hududda yashashni o‘ziga yarasha xislati bor. Unga muvofiq, biz kasallik bor hududda yashayapmizmi, ma’lum bir miqdorda virusni yuqtirib olish barobarida immunitetimiz ishlab turadi.

Xitoyda Olimpiada, Paralimpiada munosabati bilan davlatga kirish to‘xtatildi. Kasallik manbai vaqtincha jilovlab turildi. Demak, kasallik qo‘zg‘atuvchi o‘sha hududda bo‘lganligi uchun organizmdagi mavjud immunitet tarangligi pasaydi. Ularni uyg‘otib turadigan, sergak qilib turadigan viruslar bo‘lmadi. Chegara ochilgandan keyin kirib kelgan virus aynan immunitet tarangligi susaygan, ya’ni nochorlashgan immunitetda mavjud bo‘lgan yoki immuniteti umuman bo‘lmagan aholini birdaniga qamrab oldi. Shuni hisobiga kasallik avj olib ketdi.

O‘zbekistonda asosiy qurolimiz — emlash. Agar biz emlanmay qolgan yoki kimlarningdir fikrlari asosida ikkilanib turgan odamlarni ham emlash bilan qamrab oladigan bo‘lsak, biz o‘ylagan natijamizga erishamiz. Bizni bezovta qilayotgan narsa nomutaxassislar maydonga chiqyapti. Haqiqiy mutaxassislar qolib, o‘zining sohasida omadsiz bo‘lgan odamlar maydonga chiqib, emlash haqida fikr yurityapti, targ‘ibot o‘tkazyapti, odamlarning fikrlarini o‘zgartirishga harakat qilyapti. Shuning uchun soha mutaxassislarining fikrlariga ergashgan holda biz ehtiyot choralarini ko‘rishimiz va haliyam koronavirus borligini unutmagan holda emlash tadbirlariga ahamiyat beradigan bo‘lsak, biz vaziyatni idrok qila olamiz. Hozir 35 million aholiga 30-40 ta kasallik qayd etilishi juda ham barqaror degani. Lekin biz vaziyat murakkablashishi ehtimoli borligini inkor qilmaymiz.

Sanitariya-epidemiologik osoyishtalik va jamoat salomatligi xizmati boshlig‘i o‘rinbosari Nurmat Otabekov