Ўзбекистонда 2001 йилдан бери 250 нафардан ортиқ беморга сунъий ошқозон ўрнатилган. Бу ҳақда Инновация вазирлиги ўтказган «Тиббиёт илм-фани кунлари» тадбирида Республика онкология маркази директор ўринбосари Аброрбек Юсуфбеков маълум қилди, дея хабар бермоқда «Дарё» мухбири.
Аброрбек Юсуфбековнинг айтишича, 2001 йилда онкология маркази томонидан одам организми учун сунъий ошқозон яратилган ва биринчи операция амалга оширилган.
«Саратоннинг турлари жуда кўп. Ҳозирда бу касалликни 100 фоиз даволаш имкониятлари мавжуд. Саратондан даволаниб, 20-30 йилдан бери яшаётган одамлар бор. Саратон касаллигининг 4 та даражаси бўлади. 1-2 даражадаги беморлар даволанса, тузалиш эҳтимоли юқори. Масалан, сут бези саратони касаллиги билан даволанган беморларнинг 10 йил яшаш кўрсатгичи 98 фоизни ташкил қилади. Бачадон бўйни саратонида нур ва кимё терапиялари қилинганда, беморларнинг 10-15 йил яшаш кўрсатгичи бор.
Бизнинг онкология марказимизда сунъий ошқозон яратилган ва унга патент олинган. 2001 йилда шундай ускунани ўрнатиш учун биринчи операция бажарилган. Шундай ошқозон қўйилган беморлар орасида ўзимнинг кузатувимда бўлиб, 17 йилдан бери яшаб келаётганлари бор. Бугунги кунда Россияда ҳам шундай операциялар қилиняпти. Аммо бундай ошқозоннинг хорижий аналоглари жуда ҳам кам. Бу технология ҳозирга қадар яхши самара бериб келмоқда», – деди марказ вакили.
Аброрбек Юсуфбековнинг қўшимча қилишича, айни пайтда сунъий ошқозон беморнинг кўкрак қафасига ҳам ўрнатилмоқда.
«Сунъий ошқозон олдин фақат қорин бўшлиғида қўйилган бўлса, ҳозирги кунда буни кўкрак қафасига ҳам бир қисмини олиб чиқиб ўрнатмоқдамиз. Яъни қизил ўнгач саратонида, қизил ўнгачнинг пастки қисмини олиб ташлаб, ингичка ичакдан сунъий ошқозон ясаб ўрнатилмоқда. Шу пайтгача 250 нафардан ортиқ беморга сунъий ошқозонлар ўрнатилган. Натижалар касалликнинг даражасига қараб бўлади. Саратоннинг 1-2 босқичидаги беморлар албатта яшайди. Бунинг учун тўғри ташхис қўйиш, тўғри операция қилиш ва даволаш керак бўлади», – деди мутахассис.
Изоҳ (0)