Andijonda tug‘uruq paytida ayol qornida qolib ketgan salfetka qariyb bir yildan so‘ng jarrohlar tomonidan olib tashlandi

Ijtimoiy tarmoqlarda Andijon viloyati Asaka shahridagi tug‘uruqxonada bemor qornida salfetka unutib qoldirilgani, u oradan 7 oy o‘tib jarrohlar tomonidan olib tashlangani haqida xabarlar tarqaldi. Asaka tumani hokimligi holatga munosabat bildirdi.

Qayd etilishicha, tuman tibbiyot birlashmasi mas’ul xodimlari tomonidan ijtimoiy tarmoqlarda tarqalgan video bo‘yicha ishchi guruh tuzilib, o‘rganish ishlari olib borilgan. Aniqlanishicha, 2020-yilning 5-oktabrida Asaka tumanida yashovchi O‘.D.ni (1994-yilda tug‘ilgan) 2-sonli tug‘uruq uyiga shifokor akusher-ginekolog F.X. va doya S. qabul qilib olgan.

Muayyan tug‘uruq jarayoni bo‘lmagani sababli nazorat olib borish maqsadida xasta homiladorlar bo‘limiga yotqizilgan. Reja asosida laborator va instrumental tekshiruvlar o‘tkazilgan. Kuzatuv davomida ayol holati qoniqarli deb baholangan va tug‘uruq o‘tkazish rejasi tuzilgan.

Oila a’zolari bilan suhbat olib borilib, jarrohlik muolajasiga yozma rozilik olingan. Jarrohlik muolajasi kesarcha kesish usulida o‘tkazilgan. 7-oktabr kuni o‘g‘il chaqaloq tug‘ilgan. Ayol shifokor va patronaj hamshirasi nazoratida bo‘lish tavsiyasi bilan uyiga ruxsat berilgan.

2021-yilning avgust oyida O‘.D. tumandagi shifoxonalarning biriga o‘tkir bitishmali ichak tutilishi tashxisi bilan yotqizilgan. Operatsiya qilingach, uning ingichka ichagiga yot jism (salfetka) tiqilib qolgani aniqlangan. Salfetka olib tashlanib, ichak jarohati tiklangan.

Ta’kidlanishicha, ayol va uning farzandi hozirda amaliy sog‘lom. Salomatligi bo‘yicha hech qanday shikoyat va e’tirozlari yo‘q.

“Tashrif vaqtida olingan videoyozuv kelgusida shifokorlar orasida bunday qo‘pol xatolarga yo‘l qo‘ymasligi, hushyor bo‘lishlari uchun olingan va noma’lum shaxs tomonidan tarqatib yuborilgan”, — deyiladi xabarda.

Bundan avval Navoiy prokuraturasi “bitta ukol oqibatida” vafot etgan 36 yoshli ayolning ishi yuzasidan tekshiruv o‘tkazayotgani, Jizzaxda ikki nafar homilador ayol shifokor va hamshira mas’uliyatsizligi sabab vafot etgani, Nukusda patologoanatom tomonidan yorib ko‘rilgan chaqaloq tirik bo‘lib chiqqani haqida xabar berilgan.