Андижонда туғуруқ пайтида аёл қорнида қолиб кетган салфетка қарийб бир йилдан сўнг жарроҳлар томонидан олиб ташланди

Ижтимоий тармоқларда Андижон вилояти Асака шаҳридаги туғуруқхонада бемор қорнида салфетка унутиб қолдирилгани, у орадан 7 ой ўтиб жарроҳлар томонидан олиб ташлангани ҳақида хабарлар тарқалди. Асака тумани ҳокимлиги ҳолатга муносабат билдирди.

Қайд этилишича, туман тиббиёт бирлашмаси масъул ходимлари томонидан ижтимоий тармоқларда тарқалган видео бўйича ишчи гуруҳ тузилиб, ўрганиш ишлари олиб борилган. Аниқланишича, 2020 йилнинг 5 октябрида Асака туманида яшовчи Ў.Д.ни (1994 йилда туғилган) 2-сонли туғуруқ уйига шифокор акушер-гинеколог Ф.Х. ва доя С. қабул қилиб олган.

Муайян туғуруқ жараёни бўлмагани сабабли назорат олиб бориш мақсадида хаста ҳомиладорлар бўлимига ётқизилган. Режа асосида лаборатор ва инструментал текширувлар ўтказилган. Кузатув давомида аёл ҳолати қониқарли деб баҳоланган ва туғуруқ ўтказиш режаси тузилган.

Оила аъзолари билан суҳбат олиб борилиб, жарроҳлик муолажасига ёзма розилик олинган. Жарроҳлик муолажаси кесарча кесиш усулида ўтказилган. 7 октябрь куни ўғил чақалоқ туғилган. Аёл шифокор ва патронаж ҳамшираси назоратида бўлиш тавсияси билан уйига рухсат берилган.

2021 йилнинг август ойида Ў.Д. тумандаги шифохоналарнинг бирига ўткир битишмали ичак тутилиши ташхиси билан ётқизилган. Операция қилингач, унинг ингичка ичагига ёт жисм (салфетка) тиқилиб қолгани аниқланган. Салфетка олиб ташланиб, ичак жароҳати тикланган.

Таъкидланишича, аёл ва унинг фарзанди ҳозирда амалий соғлом. Саломатлиги бўйича ҳеч қандай шикоят ва эътирозлари йўқ.

«Ташриф вақтида олинган видеоёзув келгусида шифокорлар орасида бундай қўпол хатоларга йўл қўймаслиги, ҳушёр бўлишлари учун олинган ва номаълум шахс томонидан тарқатиб юборилган», — дейилади хабарда.

Бундан аввал Навоий прокуратураси «битта укол оқибатида» вафот этган 36 ёшли аёлнинг иши юзасидан текширув ўтказаётгани, Жиззахда икки нафар ҳомиладор аёл шифокор ва ҳамшира масъулиятсизлиги сабаб вафот этгани, Нукусда патологоанатом томонидан ёриб кўрилган чақалоқ тирик бўлиб чиққани ҳақида хабар берилган.