Toshkentdagi Yangi Choshtepa 21-maydan buyon elektr ta’minotidan uzilgan

Toshkent shahri Yangihayot tumani hokimligi 21-maydan buyon elektr ta’minotida uzilish holati yuzaga kelgani sabab Yangi Choshtepa aholisiga murojaat bilan chiqdi.

Qayd etilishicha, elektr ta’minotidagi uzilishga mahalladan o‘tgan 10 kV kabel tarmoqlarida noma’lum tashkilot tomonidan o‘zboshimchalik bilan yer qazish ishlari olib borilgani sabab bo‘lgan. Oqibatda kabellar shikastlanib, elektr taminotida uzilish sodir bo‘lgan.

“Tuni bilan kommunal soha xodimlari tomonidan nosozlikni bartaraf etish ishlari olib borildi. Ammo bitta nosozlik bartaraf etilishi bilan ikkinchi nosozlik holati kelib chiqdi va elektr ta’minotida qayta muammo yuzaga keldi”, — deyiladi hokimlik axborotida.

Ayni vaqtda nosozlikni bartaraf etish ishlari olib borilmoqda. Yangihayot tuman hokimligi keltirilgan noqulaylik uchun fuqarolardan uzr so‘ragan.

“Hududiy elektr tarmoqlari” aksiyadorlik jamiyatining ma’lum qilishicha, tumanning Choshtepa ko‘chasida joylashgan plastmassa sexi hududidan o‘tgan quvvati 10 kV bo‘lgan yuqori kuchlanishli kabel tarmoqlarini noma’lum pudratchi tashkilot tuman elektr ta’minot korxonasi bilan kelishmagan holda o‘zboshimchalik bilan yer qazish ishlari olib borishi oqibatida yer ostidan o‘tgan kabel tarmoqlari uzib yuborilgan.

Shu tufayli elektr energiyasi bilan ta’minlanuvchi Yangihayot tumanidagi “Choshtepa” mahallasi, Yangi Choshtepa ko‘p qavatli hamda yerli aholi yashash xonadonlarida elektr energiyasi ta’minotida uzilish sodir bo‘lgan.

Ayni paytda ushbu holat bo‘yicha “Toshkent shahar elektr tarmoqlari” AJ tasarrufidagi Yangihayot tuman elektr ta’minoti korxonasi xodimlari tomonidan nosozliklarni bartaraf etish bo‘yicha ta’mirlash ishlari olib borilmoqda.

“Tez fursatlarda nosozlik bartaraf etilib, elektr ta’minoti tiklanishini ma’lum qilamiz”, — deyiladi xabarda.