“Zamin” fondi Vasiylik kengashi raisi Ziroat Mirziyoyeva Xo‘jaobod shahridagi ikkita ixtisoslashtirilgan maktab va Andijon shahridagi ijod studiyasiga tashrif buyurdi.
Xo‘jaoboddagi maktablar boy tarixga ega. Yaqinda ular “Zamin” fondi ko‘magi bilan to‘siqlarsiz muhitda sifatli ta’lim olishga xizmat qiluvchi zamonaviy assistiv jihozlar bilan ta’minlandi.
Shuningdek, “Zamin” fondi tomonidan Tibbiy-ijtimoiy xizmatlar agentligi bilan birgalikda amalga oshirilayotgan “Eshitishni xohlayman!” xayriya loyihasi doirasida bu maktablarning barcha o‘quvchilari tashxisdan o‘tkazildi. Natijada 402 nafar o‘quvchiga zarur miqdorda raqamli eshitish moslamalari bilan 702 ta moslama bilan ta’minlandi.
Ushbu loyiha davom ettiriladi, joriy yilning o‘zida eshitishida nuqsoni bo‘lgan bolalarga yana 5600 ta raqamli eshitish moslamasi yetkazib beriladi.
Ziroat Mirziyoyeva ikkala maktabda ham bo‘lib, bu yerdagi yangi jihozlar bilan tanishdi, bolalar bilan dildan suhbatlashdi.
17-sonli maktabdagi uchrashuv ayniqsa mazmunli o‘tdi. Ushbu maktab negizida “Zamin Education” loyihasi doirasida inklyuziv IT-oromgoh tashkil etilgan.
Besh kun davomida katta sinf o‘quvchilari dasturlash va robototexnika ko‘nikmalarini faol o‘zlashtirdilar, kompyuter ilovalarini yaratdilar.
Fond Vasiylik kengashi raisi bolalarni oromgohni muvaffaqiyatli tugatganliklari bilan tabriklab, o‘qishda yangi muvaffaqiyatlar, o‘z kasbining yetuk mutaxassisi bo‘lib yetishishlarini tiladi.
Oromgoh navbati yakuniga yetgani munosabati bilan o‘tkazilgan tadbirda bolalar uchun yana bir xushxabar — www.zamineducation.uz IT-platformasidagi resurslar kontenti yanada kengaygani haqida e’lon qilindi. Bu axborot texnologiyalarini chuqurroq o‘rganish hamda sohadagi zamonaviy professional talablarga mos bo‘lishga yordam beradi.
Ziroat Mirziyoyeva “Zamin Creative” ijod studiyasida ham katta xursandchilik bilan kutib olindi. Studiya yaqinda Andijondagi Muhammad Yusuf nomidagi maktab qoshida ochildi. Bu mamlakatimizdagi uchinchi shunday studiya bo‘lib, birinchisi Qarshidagi Abdulla Oripov, ikkinchisi Toshkentdagi Abdulla Qodiriy nomidagi maktablarda o‘z ishini boshlagan.
Studiya uchta yo‘nalish: teatr san’ati, fashion design (kiyim dizayni) va mediasavodxonlikka ixtisoslashgan. O‘quv kursi 3 oydan 7 oygacha davom etadi. Har bir yo‘nalish dasturi o‘ziga xos bo‘lib, o‘qituvchilar va yurtimizdagi yetakchi mutaxassislar bilan birgalikda ishlab chiqilgan.
Ziroat Mirziyoyeva bilan birgalikda studiyaga Toshkentdagi “Zamin Creative” o‘quvchilari ham keldilar, ular qabuldan muvaffaqiyatli o‘tgan tengdoshlarini tabrikladilar va qo‘llab-quvvatladilar, o‘z ijodiy ishlarini ko‘rsatdilar, to‘plagan tajribasi va o‘qishdan olgan taassurotlari bilan bo‘lishdilar.
Yil yakuniga qadar “Zamin Creative” ijod studiyalari Namangan, Farg‘ona va Jizzax viloyatlarida ham ochilishi rejalashtirilgan.
Ma’lumot uchun: “Zamin Education” ta’lim loyihasi ixtisoslashtirilgan maktab-internatlarining eshitishida nuqsoni bo‘lgan o‘quvchilarini dasturchi, robototexnika, raqamli dizayn va media bo‘yicha mutaxassis kabi zamonaviy va talab yuqori bo‘lgan kasblarni o‘zlashtirish maqsadida IT-dasturlash va robotexnikaga o‘qitishga mo‘ljallangan.
“Zamin Creative” ta’lim dasturi yoshlarni ijodiy yo‘nalishdagi oliy ta’lim muassasalariga kirishga tayyorlash, ularda mediasavodxonlik, dizayn va aktyorlik mahorati ko‘nikmalarini shakllantirishga qaratilgan.
Izoh (0)