«Замин» фонди Васийлик кенгаши раиси Зироат Мирзиёева Хўжаобод шаҳридаги иккита ихтисослаштирилган мактаб ва Андижон шаҳридаги ижод студиясига ташриф буюрди.
Хўжаободдаги мактаблар бой тарихга эга. Яқинда улар «Замин» фонди кўмаги билан тўсиқларсиз муҳитда сифатли таълим олишга хизмат қилувчи замонавий ассистив жиҳозлар билан таъминланди.
Шунингдек, «Замин» фонди томонидан Тиббий-ижтимоий хизматлар агентлиги билан биргаликда амалга оширилаётган «Эшитишни хоҳлайман!» хайрия лойиҳаси доирасида бу мактабларнинг барча ўқувчилари ташхисдан ўтказилди. Натижада 402 нафар ўқувчига зарур миқдорда рақамли эшитиш мосламалари билан 702 та мослама билан таъминланди.
Ушбу лойиҳа давом эттирилади, жорий йилнинг ўзида эшитишида нуқсони бўлган болаларга яна 5600 та рақамли эшитиш мосламаси етказиб берилади.
Зироат Мирзиёева иккала мактабда ҳам бўлиб, бу ердаги янги жиҳозлар билан танишди, болалар билан дилдан суҳбатлашди.
17-сонли мактабдаги учрашув айниқса мазмунли ўтди. Ушбу мактаб негизида «Zamin Education» лойиҳаси доирасида инклюзив IT-оромгоҳ ташкил этилган.
Беш кун давомида катта синф ўқувчилари дастурлаш ва робототехника кўникмаларини фаол ўзлаштирдилар, компьютер иловаларини яратдилар.
Фонд Васийлик кенгаши раиси болаларни оромгоҳни муваффақиятли тугатганликлари билан табриклаб, ўқишда янги муваффақиятлар, ўз касбининг етук мутахассиси бўлиб етишишларини тилади.
Оромгоҳ навбати якунига етгани муносабати билан ўтказилган тадбирда болалар учун яна бир хушхабар — www.zamineducation.uz IT-платформасидаги ресурслар контенти янада кенгайгани ҳақида эълон қилинди. Бу ахборот технологияларини чуқурроқ ўрганиш ҳамда соҳадаги замонавий профессионал талабларга мос бўлишга ёрдам беради.
Зироат Мирзиёева «Zamin Creative» ижод студиясида ҳам катта хурсандчилик билан кутиб олинди. Студия яқинда Андижондаги Муҳаммад Юсуф номидаги мактаб қошида очилди. Бу мамлакатимиздаги учинчи шундай студия бўлиб, биринчиси Қаршидаги Абдулла Орипов, иккинчиси Тошкентдаги Абдулла Қодирий номидаги мактабларда ўз ишини бошлаган.
Студия учта йўналиш: театр санъати, фашион десигн (кийим дизайни) ва медиасаводхонликка ихтисослашган. Ўқув курси 3 ойдан 7 ойгача давом этади. Ҳар бир йўналиш дастури ўзига хос бўлиб, ўқитувчилар ва юртимиздаги етакчи мутахассислар билан биргаликда ишлаб чиқилган.
Зироат Мирзиёева билан биргаликда студияга Тошкентдаги «Zamin Creative» ўқувчилари ҳам келдилар, улар қабулдан муваффақиятли ўтган тенгдошларини табрикладилар ва қўллаб-қувватладилар, ўз ижодий ишларини кўрсатдилар, тўплаган тажрибаси ва ўқишдан олган таассуротлари билан бўлишдилар.
Йил якунига қадар «Zamin Creative» ижод студиялари Наманган, Фарғона ва Жиззах вилоятларида ҳам очилиши режалаштирилган.
Маълумот учун: «Zamin Education» таълим лойиҳаси ихтисослаштирилган мактаб-интернатларининг эшитишида нуқсони бўлган ўқувчиларини дастурчи, робототехника, рақамли дизайн ва медиа бўйича мутахассис каби замонавий ва талаб юқори бўлган касбларни ўзлаштириш мақсадида IT-дастурлаш ва роботехникага ўқитишга мўлжалланган.
«Zamin Creative» таълим дастури ёшларни ижодий йўналишдаги олий таълим муассасаларига киришга тайёрлаш, уларда медиасаводхонлик, дизайн ва актёрлик маҳорати кўникмаларини шакллантиришга қаратилган.
Изоҳ (0)