Bandlik va mehnat munosabatlari vaziri Nozim Husanov “Daryo” bilan suhbatda 2022-yilning o‘tgan davri mobaynida 1600 nafardan ortiq o‘zbekistonlik ishlash uchun Janubiy Koreyaga ketganini va yaxshi mehnat sharoitlarida ish boshlaganini ma’lum qildi.
“Pandemiya davrida fuqarolarimizdan juda ko‘plab murojaatlar kelib tushdi. Unda ko‘pchilik ishlash uchun xorijga ketish niyati borligini aytib, chegaralar qachon ochilishini so‘ragandi. Nafaqat O‘zbekistonda, dunyo mamlakatlarida ham karantin talablari yumshatilib ish jarayonlari boshlangach, 2022-yilning o‘tgan davri mobaynida 1600 nafardan ortiq o‘zbekistonlik yurtdoshimiz ishlash uchun Janubiy Koreyaga yuborildi. Va yaxshi mehnat sharoitlarida ish boshladi”, — deydi vazir Nozim Husanov.
Vazirning ma’lumot berishicha, 2022-yil boshida Janubiy Koreyaga borib ishlamoqchi bo‘lgan fuqarolar uchun 14 kunlik karantin talabi bo‘lgan.
“Elchi janoblari bilan suhbatimizda bu talab 2022-yilning aprel oyida 3 kunlik muddatga tushirilgani, koronavirusga qarshi emlash olgan o‘zbek migrantlari uchun yanayam qulaylik yaratib berilgani haqida so‘z yuritildi. Janubiy Koreyaga borib, shartnoma muddati tugagach noqonuniy ravishda Koreya Respublikasida qolib ishlayotgan fuqarolarimiz ko‘p. Qachonki, shu holat yakun topsa, ya’ni shartnoma muddati tugagach fuqarolarimiz mehnat migratsiyasidan qaytsa, o‘sha davlatda O‘zbekiston ishchilariga bo‘lgan talab ortadi va kvotalar soni ko‘payadi. Shuning uchun biz fuqarolarimizga qonuniy tartibda ishlash lozimligini eslatib, ularni shunga chaqirib qolardik”, — deydi vazir.
Mehnat vazirining aytishicha, Janubiy Koreyaga kvotaning oshirilishi ko‘pincha o‘zbek migrantlarining o‘ziga bog‘liq.
Nozim Husanovning ma’lumot berishicha, yangi tartibga ko‘ra endilikda Janubiy Koreyaga borib, viza tugash muddatiga qadar bir joyda bir yildan ortiq muddat mehnat faoliyatini davom ettirgan migrantlarga ish beruvchilar tomonidan qayta shartnomalar rasmiylashtirilib, O‘zbekistonga kelib imtihonsiz yana 4 yil-u 10 oyga Koreya Respublikasida ishini davom ettirish huquqi beriladi.
“Avval 4 yil-u 10 oy bir joyda ishlagan fuqarolarga O‘zbekistonga kelib, yana qaytib borishsa, hech qanday imtihonsiz ishlash huquqi berilar edi. Muddati kam bo‘lsa, imtihon topshirishar edi”, — dedi vazir.
Izoh (0)