O‘zbekistonda 1-iyundan ish haqi va stipendiyalar 12 foizga oshirilishi to‘g‘risida xabar berilgandi. Bloger va huquqshunos Xushnud Xudoyberdiyevning sog‘liqni saqlash vaziri o‘rinbosari Otabek Fozilkarimovga tayanib yozishicha, ish haqining oshishi tibbiyot xodimlari maoshiga ham ta’sir qiladi.
“Tibbiyot muassasalari xodimlarini moddiy qo‘llab-quvvatlash hamda rag‘batlantirishni kuchaytirish chora-tadbirlari to‘g‘risida”gi prezident farmoni bilan 1-iyundan tibbiyot xodimlarining oylik maoshi 15 foizgacha oshirilishi aytilgan edi. 20-may kuni qabul qilingan ish haqlarini oshirish haqidagi prezident farmoni asosida barcha xodimlar qatorida tibbiyot mutaxassislarining maoshi ham yana 12 foizga oshiriladi.
“Masalan, 3 million so‘m oylik oladigan tibbiyot xodimining oyligi dastlab 15 foizga oshadi deylik, shunda 3 million 450 ming so‘m bo‘ladi. Keyin yana 12 foiz oshadi va jami 3 million 864 ming so‘m bo‘ladi”, — deb yozadi Xudoyberdiyev.
Prezident farmoniga ko‘ra, O‘zbekiston hududida eng kam ish haqi miqdori oyiga 920 ming so‘m, bazaviy hisoblash miqdori — 300 ming so‘m etib belgilandi.
Izoh (0)