Rossiya tomonidan Ukrainada harbiy operatsiyalar boshlanganidan keyin egasi bilan Fransiyaga ko‘chib o‘tgan xarkovlik Stepan laqabli mushuk inflyuenserlar va blogerlarning World Influencers and Bloggers Awards xalqaro mukofotini qo‘lga kiritdi. Bu haqda mushukning egasi Instagram’dagi sahifasi orqali ma’lum qildi, deb xabar beradi “Pravilamag”.
Stepan mukofotga “Hayvon bilan eng yaxshi akkaunt” yo‘nalishida loyiq ko‘rilgan. Mushuk egasi uy hayvonini Kannga olib kelgan — u qizil yo‘lak orqali harakatlanib, mashhur tiktoker Xabi Leym bilan suratga tushgan.
World Influencers and Bloggers Awards — blogerlarni taqdirlashga mo‘ljallangan dunyodagi birinchi marosim. U 2019-yildan buyon Kann kinofestivalining ochilish vaqtida Martinez mehmonxonasida o‘tkazib kelinadi.
Harbiy operatsiya boshlanganidan so‘ng Stepan Ukrainadagi hayvonlarga yordam ko‘rsatish uchun 10 ming dollar to‘plagandi. World Influencers and Bloggers Awards marosimida ham ukrainaliklarga yordam ko‘rsatish maqsadida xayriya mablag‘lari to‘plangan.
Stepan laqabli mushuk 2021-yilda TikTok yulduziga aylangan edi. Uning bir bokal ichimlik qarshisida o‘yga tolgan holda o‘tirgan holati, yuzida ifodalangan butun koinotning g‘am-tashvishlari surati mashhurlikka erishgandi.
Izoh (0)