Kompyuter o‘yinlari haqidagi Kotaku sayti Maylo laqabli mushuk tomonidan yozilgan maqolani e’lon qildi, deb xabar beradi Esquire. Mushuk egasi — portal mualliflaridan biri Liza Mari Segarra hisoblanadi. Uning so‘zlariga ko‘ra, Maylo quchoqlashishni yaxshi ko‘radi va uni qo‘lga olmagunlaricha miyovlab turaveradi.

Foto: Instagram / @lisamarie_lynn

Shuningdek, mushuk tez-tez klaviatura ustida chiqib olib, Kotaku’ning boshqa xodimlariga xabarlar jo‘natib turadi. “Bir safar Maylo haydab yuborishgunlariga qadar juda uzoq klaviatura ustida o‘tirdi. Uning xabari shu qadar uzunligidan, Slack xabarni bizga yuborishga imkon bermadi. Buning o‘rniga uni maqola ko‘rinishida chop etishga qaror qildik”, — deyiladi xabar avvalida. Ta’kidlanishicha, Mayloning maqolasini bir qismi e’lon qilingan, to‘liq versiyasi bilan Kotaku sayti orqali tanishish mumkin.

Foto: Esquire

Foydalanuvchilar xabar ostiga mushuk maqolada Norvegiya va Daniya alifbosidagi harflardan foydalanganini yozib, unga Pulitsar mukofotini berishni taklif qilmoqda. Shuningdek, bir foydalanuvchi uning uy hayvoni o‘z fikrlarini diskord orqali yetkazayotganini ma’lum qilgan. “Nima uchun mushuk bunday noaniq, ammo jasoratli matn yozdi?” — deydi Davey nikli foydalanuvchi.

Jurnalistikadan bo‘sh vaqtida Maylo o‘z egasi bilan “Jinoyatchi kabi fikrlash” nomli FQB tergovchilarining ishiga oid detektiv seriallarni ko‘radi.

Avvalroq TikTok’da bir bokal ichimlik qarshisida o‘yga tolgan holda o‘tirgan Stepan laqabli mushuk mashhurlikka erishgan edi.