AQSHning Arkanzas shtatida yashovchi Xeyli Skoch Garri Potter kitoblari sahifalaridan bitiruv kechasi libosini yaratdi. Bu haqda “Korrespondent.net” nashri xabar berdi.
Bu kitoblar 18 yoshli qiz uchun alohida ahamiyatga ega, chunki aynan ushbu kitoblar ota-onasi ajrashgandan keyin Xeylining o‘ziga kelishiga yordam bergan.
Xeylining so‘zlariga ko‘ra, u bayramda hammaning hayratiga sabab bo‘lgan. Qolaversa, unga ikkita kutubxona libosni ko‘rgazmada namoyish etish iltimosi bilan murojaat qilgan.
Skoch ushbu g‘oyani TikTok’dagi videodan ilhomlanib olganini ta’kidladi. U libosni yaratish uchun to‘rt kun sarfladi. Xeyli kitob sahifalarini birma-bir ajratdi, ularni xuddi yelpig‘ich ko‘rinishida bukib, bir-biriga mahkamladi.
“Men buni haqiqatan ham noan’anaviy bo‘lishini xohlardim va har doim Garri Potterga mubtalo bo‘lganman. Shuningdek, o‘qishni yaxshi ko‘raman. Shuning uchun kitoblar yig‘ib, ulardan oqshom libosini yaratishga qaror qildim”, — dedi amerikalik qiz va libosni Garri Potter haqidagi filmlarni tomosha qilish jarayonida tikkanini qo‘shimcha qildi.
“Men hayotidan birozgina mo‘jiza izlagan uyatchan, mijg‘ov va telbaroq qizaloq edim. Bu kitoblar zaif va eng muhtoj paytimda ilhom manbai bo‘ldi. Men bu kitoblarni juda ham yaxshi ko‘raman”, — deya xulosa qildi Xeyli.
Izoh (0)