Qozog‘istonning Chimkent shahridagi tug‘uruqxona yaqinida portlash sodir bo‘ldi. Bu haqda “RBK” xabar bermoqda.
Portlash oqibatida ikki qavatli “Kasalxona qoshidagi 138-dorixona” MCHSH binosida yong‘in yuzaga kelgan. Toshkent vaqti bilan 14:06 da yong‘in tarqalishi to‘xtatilgan, dastlabki ma’lumotlarga ko‘ra, yong‘in maydoni 55 kvadrat metrni tashkil qilgan.
Shuningdek, Chimkent favqulodda vaziyatlar xizmati xabariga ko‘ra, portlash natijasida bir bino qisman qulagan hamda yaqinda joylashgan besh qavatli uy xonadonlaridan birining derazalari va balkoniga zarar yetgan, bundan tashqari, yettita yengil avtomobil zarar ko‘rgan.
Yong‘inni o‘chirish chog‘ida qutqaruvchilar erkak kishining kuygan jasadini aniqlagan. Yong‘inni bartaraf etishga 37 nafar xodim va 9 ta texnika jalb qilingan. Hodisa sabablari aniqlashtirilmoqda.
Tengrinews aniqlik kiritishicha, dastlabki ma’lumotlarga ko‘ra, portlashga gaz to‘planib qolishi sabab bo‘lgan. Voqea joyida qorovul halok bo‘lgan. Boshqa jabrlanganlar haqida ma’lumot yo‘q.
Hodisadan keyin tug‘uruqxonadan 100 ga yaqin odam evakuatsiya qilingan. Ba’zi OAVlar kislorod balloni portlaganini yozmoqda. Politsiya portlash holati yuzasidan jinoiy ish ochdi.
Izoh (0)