Qozog‘iston prezidenti Qosim-Jo‘mart To‘qayev respublika Milliy xavfsizlik qo‘mitasini isloh qilish haqidagi farmonni imzoladi. MXQning yangilangan tuzilmasi tasdiqlandi, deb xabar beradi Anadolu agentligi.
Hujjat bilan Qozog‘iston prezidentining 15 ta farmoniga tuzatishlar kiritilgan, ular milliy xavfsizlik organlari faoliyatini takomillashtirishni ko‘zda tutadi.
Xususan, MXQning yangilangan tuzilmasi tasdiqlandi, qo‘mitaning alohida davlat muassasalari qaytadan tashkil qilindi va takomillashtirildi.
Farmon loyihasiga ko‘ra, qaytadan tashkil qilinadigan respublika davlat muassasalari ro‘yxatiga, xususan, MXQning Axborotni texnik himoya qilish markazi, shuningdek, muassasaning Axborot xavfsizligi sohasidagi mutaxassislarni tayyorlash va malakasini oshirish markazi kiradi. Ular “Qozog‘iston Respublikasi Milliy xavfsizlik qo‘mitasining Axborotni texnik himoyalash va davlat sirlarini himoya qilish sohasida mutaxassislarni tayyorlash markazi” respublika davlat muassasasiga birlashtiriladi.
Bundan tashqari, chegara xizmatining hududiy departamentlari qayta tashkil qilinadi, MXQ aviatsiya xizmatiga ega uning boshqarmasini ham qo‘shib qo‘yishadi.
To‘qayev MXQ isloh etilishini joriy yil 12-yanvarida Majlis yig‘ilishida e’lon qilgandi.
“Qurolli kuchlarimiz, huquq-tartibot tuzilmalarimiz, milliy xavfsizlik organlarimiz, tashqi razvedkamizni qayta qurish kerak bo‘ladi. Ularning barchasi bitta maqsad — fuqarolarimizni, konstitutsiyaviy tuzumni va suverenitetimizni har qanday xususiyatga va ko‘lamga ega bo‘lgan xavf ostida maksimal darajada samarali himoya qilish yo‘lida uyg‘unlik bilan ishlashi kerak. Buni davlatimizning tub manfaatlari talab qiladi”, — degan edi prezident o‘shanda.
Eslatib o‘tamiz, yanvar boshida Qozog‘istonda ommaviy tartibsizliklar bo‘lib o‘tgandi, ularning ishtirokchilari politsiyachilarga va harbiylarga hujum qilgandi. To‘qayev bo‘lib o‘tgan voqealarni davlat to‘ntarishiga urinish deb atadi va Kollektiv xavfsizlik shartnomasi tashkilotiga murojaat qilishga majbur bo‘ldi. 7-yanvarga kelib, vaziyatni barqarorlashtirishga muvaffaq bo‘lindi. Keyinroq davlat rahbari davlat to‘ntarishi uyushtirishga uringanlar orasida yuqori mansabli shaxslar, shuningdek, harbiy va maxsus organlar rahbarlari bo‘lganini ma’lum qildi.
Izoh (0)