Qirg‘izistonda Asman “kelajak shahri” quriladi

Qirg‘izistonning Issiqko‘l viloyatida Asman kelajak shahrini qurish rejalashtirilmoqda, deb yozadi Asia-Plus. “Asman ekologik toza kelajak shahri”, taqdimotda aytilganidek, mamlakatning iqtisodiy va sayyohlik markaziga aylanishi ko‘zda tutilgan. U yerda yarim million odam istiqomat qilishi rejalashtirilgan.

Mamlakat prezidenti huzuridagi Investitsiyalar agentligi direktori Ravshanbek Sobirov ma’lum qilishicha, shahar qurilishi nazarda tutilgan hudud biosfera zonasiga kiradi.

“Shu sababli biz maydonni 10 kilometrga siljitishga qaror qildik. Endi u To‘ru-Ayg‘ir ovuli va Tomchidagi aeroport oralig‘ida joylashdi. Bu aeroportga 10—12 kilometrga yaqinroq”, — deya aniqlik kiritdi mansabdor.

Asman kelajak shahri maydoni avvalgidek 4 ming gektarni tashkil etadi. Investorlarni jalb qilish bo‘yicha muzokaralar davom etmoqda.

Tanlangan hudud biosfera zonasiga kirishi sababli u yerda shaharni qurish mumkin emasligi haqida aktivistlar bir necha oy avvalroq gapirgan edi.

Issiqko‘lda ekologik toza Asman shahrini bunyod qilish prezident Sadir Japarovning orzusi bo‘lib, uni hukumat yaqin 5 yil ichida amalga oshirmoqchi.

Vazirlar mahkamasi raisi Akilbek Japarov 15-fevral kuni bo‘lib o‘tgan matbuot anjumanida hukumat yangi shaharning bosh rejasini ishlab chiqayotgani, suv va elektr energiyasi bilan ta’minlash manbalarini qidirayotganini ma’lum qilgandi.

Loyihaning taxminiy qiymati 20 milliard dollarni tashkil etadi. Avvalroq Fransiya kompaniyasi Asman investoriga aylanishi aytilgandi.

Issiqko‘l sohili yaqinida 4 ming gektar hududda quriladigan shahar shakli qush parvozi balandligidan qo‘biz — qirg‘iz milliy musiqa asbobini eslatadi. U yerda ilg‘or ta’lim tizimi joriy etilishi, zamonaviy sog‘lomlashtirish va biznes markazlari, stadionlar qurilishi, yuqori texnologiyalar parklari, moliya-kredit muassasalari bo‘lishi ko‘zda tutilgan.

Ishlab chiqarish infratuzilmasi muqobil energiya manbalari, resurslardan optimal foydalanish, ekologik toza transport turlarini ishlatish, shuningdek, yashil iqtisodiyot tamoyillariga rioya qilishni nazarda tutuvchi “aqlli shahar” sinfidagi yuqori texnologik ishlanmalarga asoslanadi.