Chuqur iqtisodiy inqiroz davom etayotgan Shri-Lankada yonilg‘i tanqisligi tufayli 20-may, juma kuni barcha o‘quv muassasalari yopildi, deb xabar beradi Anadolu Agency.
“Yonilg‘i yetishmasligi va transport vositalari bilan bog‘liq muammolar tufayli” hukumat asosiy xizmatlarni ko‘rsatuvchilardan tashqari barcha davlat xizmatchilariga ham vaqtinchalik ishga chiqmaslikni buyurdi.
Butun mamlakat bo‘ylab minglab transport vositalari bir necha kundan buyon avtomobilga yonilg‘i quyish shoxobchalarida uzun navbatlarga tizilgan.
Hukumat o‘tkir yonilg‘i tanqisligi davriga tayyorlanishga urinmoqda, u bir necha kun davom etishi kutilmoqda.
Hozirgi vaqtda Shri-Lankada benzin deyarli qolmagan, shuningdek, boshqa yonilg‘i turlari, import oziq-ovqat mahsulotlari va dorilar yetishmovchiligi ham kuzatilmoqda.
Avvalroq Shri-Lanka birinchi marta tashqi qarz bo‘yicha majburiyatlarini bajara olmay, defolt holatini e’lon qildi.
Orol davlat Markaziy banki rahbari Nandalal Virasingxe xorijiy valyutaning jismoniy shaxslar qo‘lida bo‘lishiga ruxsat etilgan summasi 15 mingdan 10 ming dollargacha pasaytirilishini e’lon qildi.
Shri-Lanka bosh vaziri Ranil Vikramasingxe og‘ir iqtisodiy inqiroz fonida mamlakatda oziq-ovqat tanqisligi yuzaga kelishi ehtimoli haqida ogohlantirdi. Shuningdek, u hukumat oziq-ovqat xavfsizligini ta’minlash bo‘yicha sa’y-harakatlarni amalga oshirayotganini ma’lum qildi.
“AQSH global oziq-ovqat tanqisligini prognoz qildi hamda Shri-Lanka va Afg‘oniston undan qattiq jabr ko‘rishini qayd etdi”, — deb yozdi Vikramasingxe o‘z Twitter’ida.
O‘tgan hafta tartibsizliklar bilan birga kechgan norozilik namoyishlari fonida hukumatning avvalgi rahbari, prezident Gotabaya Rajapaksaning akasi Maxinda Rajapaksa iste’foga chiqdi. Ammo namoyishchilar aksiyalarni yakunlamadi, ular, xususan, prezident iste’fosini ham talab qilmoqda.
Shri-Lankadagi noroziliklar bir necha oylardan buyon davom etmoqda. So‘nggi kunlarda ularga tartibsizliklar, o‘t qo‘yishlar hamrohlik qildi. Sakkiz kishi halok bo‘ldi, 200 dan ortiq odam jabrlandi, o‘t qo‘yilishi oqibatida 60 ta transport vositasi va yuzdan ortiq binolar yo‘q qilindi.
Shri-Lanka 1948-yil — Buyuk Britaniyadan mustaqil bo‘lib ajralib chiqqanidan buyon eng jiddiy inqirozni boshidan kechirmoqda.
Mavzuga doir:
- Shri-Lanka Osiyo-Tinch okeani mintaqasidagi XXI asrda defolt bo‘lgan ilk davlatga aylandi
- Shri-Lankadagi eng nufuzli siyosatchi va sobiq bosh vazir Mahinda Rajapaksa norozilik namoyishlari sabab harbiy bazaga qochib ketdi
- Foto: Shri-Lankada hukumatga qarshi norozilik namoyishlari davom etmoqda
- Shri-Lanka politsiyasi yonilg‘i narxidan norozi namoyishchilarga qarata o‘t ochdi
Izoh (0)