AQSH prezidenti Jo Baydenning Yaponiya va Janubiy Koreyaga safari boshlangan bir paytda Xitoy harbiylari Janubiy Xitoy dengizida harbiy mashg‘ulotlarga start berdi, deb yozmoqda Associated Press.
Xitoyning Xaynan provinsiyasidagi dengiz xavfsizligi boshqarmasi mashg‘ulotlar 23-maygacha davom etishini aytdi. Harbiy bo‘lmagan kemalarning barchasiga manyovr zonasiga kirish taqiqlanadi.
Shu bilan birga, may oyining boshidan buyon Yapon dengizida Xitoyning birinchi aviatashuvchisi “Liyaonin” suzib yuribdi. Xitoy Mudofaa vazirligining xabar berishicha, aviatashuvchi xalqaro huquq normalariga rioya qilgan holda “normal jangovar tayyorgarlik” bilan shug‘ullanmoqda. Bundan tashqari, Xitoy OAVlari 18-may kuni XXR qo‘mondonligi hudud bo‘ylab uchish uchun yadroviy qurol olib yurishga qodir bo‘lgan ikkita H-6 bombardimonchi samolyotini jo‘natgani haqida xabar berdi.
Bayden 20—24-may kunlari Janubiy Koreya va Yaponiyaga tashrif buyurib, u yerda ikki davlat rahbarlari bilan uchrashadi. Bundan tashqari, Tokioda AQSH prezidenti xavfsizlik bo‘yicha to‘rt tomonlama muloqot (AQSH, Avstraliya, Hindiston va Yaponiyadan iborat QUAD) yetakchilari bilan uchrashadi.
Xitoy va ASEAN (Filippin, Malayziya, Bruney, Vyetnam) a’zolari Janubiy Xitoy dengizidagi Spratli arxipelagi (xitoycha nomi – Nansha) ustidan hududiy bahs olib bormoqda. Xitoy bir qator atoll va riflarni kamida yettita sun’iy orolga aylantirdi, havo yo‘laklari va boshqa harbiy inshootlar qurdi. Qo‘shma Shtatlar Pekinni Xitoy bahsli orollarda harbiy bazalar o‘rnatganlikda ayblaydi va buni xalqaro qonunlarni buzish deb hisoblaydi.
Avvalroq AQSH razvedkasi Baydenning Janubiy Koreya yoki Yaponiyaga tashrifi chog‘ida Shimoliy Koreya tomonidan yadroviy sinovlar o‘tkazilishi haqida ogohlantirgan edi.
Izoh (0)