АҚШ президенти Жо Байденнинг Япония ва Жанубий Кореяга сафари бошланган бир пайтда Хитой ҳарбийлари Жанубий Хитой денгизида ҳарбий машғулотларга старт берди, деб ёзмоқда Associated Press.
Хитойнинг Хайнан провинциясидаги денгиз хавфсизлиги бошқармаси машғулотлар 23 майгача давом этишини айтди. Ҳарбий бўлмаган кемаларнинг барчасига манёвр зонасига кириш тақиқланади.
Шу билан бирга, май ойининг бошидан буён Япон денгизида Хитойнинг биринчи авиаташувчиси «Лияонин» сузиб юрибди. Хитой Мудофаа вазирлигининг хабар беришича, авиаташувчи халқаро ҳуқуқ нормаларига риоя қилган ҳолда «нормал жанговар тайёргарлик» билан шуғулланмоқда. Бундан ташқари, Хитой ОАВлари 18 май куни ХХР қўмондонлиги ҳудуд бўйлаб учиш учун ядровий қурол олиб юришга қодир бўлган иккита Ҳ-6 бомбардимончи самолётини жўнатгани ҳақида хабар берди.
Байден 20—24 май кунлари Жанубий Корея ва Японияга ташриф буюриб, у ерда икки давлат раҳбарлари билан учрашади. Бундан ташқари, Токиода АҚШ президенти хавфсизлик бўйича тўрт томонлама мулоқот (АҚШ, Австралия, Ҳиндистон ва Япониядан иборат QUAD) етакчилари билан учрашади.
Хитой ва ASEAN (Филиппин, Малайзия, Бруней, Вьетнам) аъзолари Жанубий Хитой денгизидаги Спратли архипелаги (хитойча номи – Нанша) устидан ҳудудий баҳс олиб бормоқда. Хитой бир қатор атолл ва рифларни камида еттита сунъий оролга айлантирди, ҳаво йўлаклари ва бошқа ҳарбий иншоотлар қурди. Қўшма Штатлар Пекинни Хитой баҳсли оролларда ҳарбий базалар ўрнатганликда айблайди ва буни халқаро қонунларни бузиш деб ҳисоблайди.
Аввалроқ АҚШ разведкаси Байденнинг Жанубий Корея ёки Японияга ташрифи чоғида Шимолий Корея томонидан ядровий синовлар ўтказилиши ҳақида огоҳлантирган эди.
Изоҳ (0)