Kanada Rossiyaga qarshi yangi sanksiyalar kiritib, hashamat va zeb-ziynat buyumlarini mamlakatga olib kirish va u yerdan olib chiqishni taqiqladi. Shuningdek, Ottava sanksiyalar ro‘yxatini kengaytirib, unga 14 nafar rossiyalikni qo‘shdi, deb yozadi “RBK”.
“Kanada Rossiya hashamat buyumlari, shu jumladan, alkogolli ichimliklar, tamaki, ba’zi turdagi to‘qimachilik buyumlari va lyuks sinfidagi sport kiyimlari, oyoq kiyimlar, kiyim-kechak va aksessuarlar, qimmatbaho taqinchoqlar, idish-tovoqlar va san’at asarlari eksportini taqiqlaydi”, — deyiladi Kanada Tashqi ishlar vazirligi xabarida. Rossiyadan alkogolli ichimliklar, dengiz mahsulotlari, baliq va olmos olib kirish taqiqlanadi.
Kanada hukumati ma’lumotlariga ko‘ra, gap 75,7 million dollarlik mahsulotlar haqida bormoqda. Ottava qayd etishicha, “Rossiya tomonidan qurol yasashda qo‘llanilishi mumkin bo‘lgan” tovarlar eksporti ham man qilinadi.
Rossiyaga kommunikatsiya qurilmalari, chunonchi, kompyuterlar, mobil telefonlar, modemlar, printerlar eksporti ham taqiq ostiga olindi. Rossiyaga kiritilishiga yo‘l qo‘yilmaydigan hashamat buyumlari qatoriga pivo, vino, atir, ko‘z pardozi uchun vositalar, mo‘ynali teri, ipak matolar, gilamlar, mototsikllar, avtomobillar, qo‘l soatlari, antikvariat kirdi.
Kanada hukumati ta’kidlashicha, cheklovlar AQSH va Yevropadagi sheriklar bilan muvofiqlashtirilgan holda kiritilmoqda. Yevroittifoq va AQSH Rossiyaga hashamat buyumlari eksportini mart oyidayoq taqiqlagan edi.
Mavzuga doir:
- Kanada Putinning ikki qizi, Lavrovning oilasi va rossiyalik biznesmenlarga qarshi sanksiyalar qo‘llaganini e’lon qildi
- Yevroittifoq Putinning qizlari va “Komsomolskaya Pravda” bosh muharririga nisbatan sanksiyalar kiritdi
- AQSH Rossiyaga investitsiya kiritishni taqiqladi va “Sberbank” hamda “Alfabank”ka nisbatan sanksiyalar joriy qildi. Putinning qizlari ham AQSHning yangi sanksiyalariga uchragan
Izoh (0)