AQSH Davlat kotibi Entoni Blinkenning aytishicha, 1990-yillarda Rossiya NATOga kirish taklifini rad etgan. Bu haqda u teleboshlovchi Stiven Kolberga bergan intervyusida aytdi, ularning suhbati stenogrammasi AQSH Davlat departamenti saytida chop etildi.
Suhbat chog‘ida Kolber Rim papasi Fransiskning so‘zlarini eslatdi. Papa NATOning Rossiya chegaralarigacha kengayishi Ukrainada urush boshlanishiga hissa qo‘shganini aytgandi. Blinken bunga javoban NATOning Rossiyaga nisbatan agressiv niyati yo‘qligini aytdi:
NATO mudofaa ittifoqidir, davlatlar birlashadi, agar ulardan biriga hujum qilinsa, qolgan hamma kelib uni himoya qiladi. Alyansning mohiyati shundan iborat. Uning Rossiyaga qarshi agressiv niyati yo‘q. U hech qachon Rossiyaga hujum qilmagan, hujum qilmaydi ham. NATO Rossiyaga hujum qilmoqchi emas.Bunga javoban jurnalist hazillashib, Rossiyani NATOga qabul qilishni taklif qildi. Blinken esa shunday javob berdi: “Bilasizmi, 1990-yillarda haqiqatan ham bu haqda gap bo‘lgan. Rossiyaliklarning o‘zi bundan bosh tortgan”, — dedi Davlat departamentining rahbari.
Rossiya prezidenti Vladimir Putin 1990—2000-yillarda Rossiyaning NATOga kirishi masalasi ko‘tarilganini bir necha bor ta’kidlagan. 2017-yilda Putin AQSHning 42-prezidenti Bill Klinton unga bu haqda o‘ylab ko‘rishni taklif qilganini aytgan. Putinning ta’kidlashicha, u “qarshi emasman” deb javob bergan, “bundan esa butun AQSH delegatsiyasi asabiylashgan.”
2022-yil fevral oyida Putin Klintonning taklifga javobi “juda vazmin bo‘lganini” ma’lum qildi. O‘z navbatida, Bill Klinton u Boris Yelsinga ham, Vladimir Putinga ham Rossiyani NATOga qo‘shishni taklif qilganini aytdi.
Izoh (0)