AQSh razvedkasi prezident Jo Baydenning Janubiy Koreya yoki Yaponiyaga bo‘lg‘usi tashrifi chog‘ida KXDR tomonidan yadroviy yoki raketa sinovlari o‘tkazilishi haqida ogohlantirdi, deb yozadi “RBK”. Bu haqda AQSh milliy xavfsizlik bo‘yicha maslahatchisi Jeyk Sallivan ma’lum qildi.
“Razvedka ma’lumotlarimiz prezidentning mintaqaga tashrifi chog‘ida yoki bo‘lmasa, undan oldin yo keyin raketa sinovlari, shu jumladan, uzoq masofali raketalar sinovi yoki yadroviy sinovlar, yoki, ochig‘ini aytganda, unisi ham, bunisi ham amalga oshirilishining real ehtimolini ko‘rsatmoqda”, — dedi Sallivan va Vashingtonda barcha kutilmagan holatlarga tayyorlanishayotganini ta’kidladi.
AQSh ushbu masala bo‘yicha o‘z xatti-harakatlarini Janubiy Koreya va Yaponiya bilan yaqindan muvofiqlashtirmoqda, dedi Sallivan, shuningdek, u xitoylik hamkasbi Yan Szech bilan telefon suhbatida voqealar rivojining bunday ehtimolidan xabardor qilganini aytdi.
Ayni vaqtda Janubiy Koreya KXDR yangi yadro sinovlariga tayyorlanayotganini ma’lum qildi. Seul razvedka agentligi ma’lumotlariga ko‘ra, KXDR yettinchi yadroviy sinovga tayyorgarlikni yakunlamoqda va uni o‘tkazish vaqtini belgilamoqda.
Seul taxmin qilishicha, Shimoliy Koreya “mamlakatdagi kuchli COVID-19 epidemiyasiga qaramasdan” sinovlarni o‘tkazadi va KXDR AQSh prezidenti Jo Baydenning Seulga tashrifiga bag‘ishlangan provokatsiyani tayyorlashi mumkin.
Avvalroq Oq uy matbuot kotibi Karin Jan-Pyer Bayden Janubiy Koreyaga tashrifi chog‘ida Shimoliy Koreya bilan chegaradagi Qurolsizlantirilgan zonaga bormasligini ma’lum qilgandi.
Baydenning Yaponiya va Janubiy Koreyaga ishchi tashrifi 20—24-may kunlari bo‘lib o‘tadi. Janubiy Koreyada Amerika prezidenti mamlakatning yaqinda saylangan prezidenti Yun Sok Yol bilan uchrashadi. Tokioda esa u Yaponiya bosh vaziri Fumio Kisida bilan muzokaralar o‘tkazadi, shuningdek, Quad (Xavfsizlik bo‘yicha to‘rt tomonlama muloqot) doirasida Yaponiya, Avstraliya va Hindiston vakillari bilan uchrashadi.
Izoh (0)