Turkiya tashqi ishlar vaziri Mevlut Chavusho‘g‘li Stokgolmning NATOga a’zo bo‘lish rejalarini muhokama qilish chog‘ida Shvetsiya tashqi ishlar vaziri Ann Lindega “ovozini ko‘tardi”. Bu haqda Reuters manbalari xabar bermoqda. Ushbu holat diplomatik protokolning jiddiy buzilishidan dalolat beradi.
NATOdagi diplomatik manbaga ko‘ra, turk vaziri Lindaga “uning ko‘plab keskinliklarni keltirib chiqargan feministik siyosatidan g‘azabdaligini” aytgan.
Reuters’ning NATOdagi suhbatdoshlari alyans uchun “tarixiy lahzada” Turkiya rasmiylaridan bunday xatti-harakatni kutmaganini ochiq aytishdi.
“Biz turkiyalik hamkasbimiz nima istayotganini tushunishga harakat qildik, haqiqatan nimani xohlayotganini”, — dedi boshqa manbalar singari, masalaning nozikligi sabab ismini oshkor qilmaslik sharti bilan gapirgan diplomat. “Bu xijolatli bo‘ldi”, — dedi u.
Turk diplomatik manbasi, o‘z navbatida, tashqi ishlar vazirlari o‘rtasidagi muzokaralarning boshqacha versiyasini taqdim etdi. Uning so‘zlariga ko‘ra, Chavusho‘g‘li “Turkiya pozitsiyasini hurmat bilan bildirgan” va Lindening Anqara Shvetsiyani NATOda ko‘rishni istamasligi qirollik tomonidan olib borilayotgan “feministik tashqi siyosat” bilan bog‘liq degan da’vosini rad etgan.
“Finlyandiyadan kelgan bayonotlar puxta o‘ylangan bir vaqtda uning (Lindaning) izohlari Shvetsiyaning NATOga kirishiga yordam bermaydi”, — dedi manba.
NATO a’zosi bo‘lgan Turkiya Shvetsiya va Finlyandiyaning alyansga qo‘shilish bo‘yicha muzokaralar boshlanishiga to‘siq qo‘ydi. Turkiya hukumati Shvetsiya va Finlyandiyaning NATOga qo‘shilishiga rozilik berish uchun o‘z shartlarini e’lon qildi. Xususan, ikki mamlakat Kurdiston ishchilar partiyasini va unga aloqador tuzilmalarni terrorchilik tashkiloti deb tan olishini talab qilmoqda. Shuningdek, Turkiya F-16 qiruvchi samolyotlarining yangi partiyasini qo‘lga kiritishga hamda yana F-35 qiruvchilarini yetkazib berish dasturiga kirishga umid qilmoqda.
Izoh (0)