Afg‘oniston Tojikiston va O‘zbekistondan import qilinayotgan elektr energiyasi uchun 100 million dollar qarzdor bo‘lib qolgan. Bu haqda TOLO News energetika va suv resurslari vazirligiga tayanib xabar bermoqda.
Shu bilan birga, agentlik ma’lumotlariga ko‘ra, vazirlik vakili Axtar Muhammad Nusrat ular to‘lashga tayyorligini, ammo Markaziy Osiyo mamlakatlaridagi banklarda hozir pul o‘tkazmalari bilan bog‘liq qiyinchiliklar borligini ta’kidladi.
Afg‘onistonning Da Afghanistan Breshna Sherkat (DABS) sobiq rahbari Omonulla G‘olib ma’lum qilishicha, Afg‘oniston Markaziy Osiyo mamlakatlariga elektr energiyasi sotib olish uchun yiliga qariyb 300 million dollar to‘laydi.
“Afg‘oniston o‘z elektr energiyasining katta qismini O‘zbekistondan sotib oladi. Bu yiliga taxminan 108 million dollarni tashkil qiladi. Hozir hisoblarni to‘lashda muammo bo‘lmoqda”, — dedi u va Ukrainadagi urush qo‘shni mamlakatlar uchun bank jarayonini murakkablashtirganini ta’kidladi.
Shu yilning yanvarida Dushanbedagi matbuot anjumanida “Barki Tochik” OAXK rahbari Mahmadumar Asozoda DABS’ning Tojikiston oldida elektr energiyasidan qarzi 33 million dollarni tashkil etishini aytgandi.
Afg‘oniston o‘z elektr energiyasining 80 foizdan ortig‘ini qo‘shni mamlakatlardan import qiladi va agar ushbu mamlakatlar elektr energiyasini o‘chirib qo‘ysa, o‘n milliondan ziyod afg‘onlarning uylarida chiroq o‘chadi, deb fikr bildiradi ekspertlar.
Yuzaga kelgan qarzdorlikni to‘lash bilan bog‘liq asosiy muammoni “Barki tochik” rahbari Afg‘oniston bank tizimidagi murakkab vaziyat bilan bog‘ladi. Uning qayd etishicha, ayni paytda Afg‘oniston banklari DABS’ga tojik elektr energiyasiga to‘lash uchun haftasiga faqat 2 million dollar taqdim etishi mumkin.
2021-yil oktabr oyida Afg‘oniston energetika kompaniyasining O‘zbekiston, Tojikiston, Turkmaniston va Eronga elektr energiyasi uchun 51 million dollardan ortiq qarzi borligi xabar qilingan edi. Biroq O‘zbekiston bosh vaziri o‘rinbosari Sardor Umurzoqovning so‘zlariga ko‘ra, Afg‘oniston muvaqqat hukumati elektr energiyasi bo‘yicha qarzini to‘liq qoplash majburiyatini olgan va O‘zbekiston “bir soat ham” Kobulga elektr energiyasi yetkazib berishni to‘xtatmagan.
Shu yil boshida esa O‘zbekiston va Afg‘oniston 2022-yilda elektr energiyasi yetkazib berish bo‘yicha 100 million dollarlik shartnoma imzoladi. Qayd etilishicha, Markaziy Osiyoning yagona energetika tizimi Afg‘onistonga faqat O‘zbekiston orqali ulangan. Yagona energiya tizimi mamlakatlarida ishlab chiqarilgan elektr energiyasi faqat O‘zbekistondan eksport qilinishi mumkin.
Mavzuga doir:
Izoh (0)