Афғонистоннинг Энергетика ва сув вазирлиги Ўзбекистон ва Тожикистондан импорт қилинадиган электр энергияси учун 100 миллион доллардан ортиқ қарзи борлигини маълум қилди, деб хабар беради TOLOnews нашри.
Энергетика ва сув вазирлиги матбуот котиби Ахтар Муҳаммад Нусратнинг айтишича, ҳозирда Марказий Осиё давлатлари, хусусан, Ўзбекистон ва Тожикистон банклари пул ўтказишда қийинчиликларни бошдан кечирмоқда, бу эса Афғонистон «Миллий электр компанияси»га қарзларини тўлашига тўсқинлик қилмоқда. Унинг маълум қилишича, вазирлик электр энергияси учун пул тўлашга ҳаракат қиляпти.
«Ўзбекистоннинг ўз муаммолари бор, биз тўламоқчимиз, лекин муаммо банкларда», — дейди Ахтар Муҳаммад Нусрат.
«Миллий электр компанияси»нинг собиқ раҳбари Омонулла Ғолибнинг айтишича, Афғонистон Марказий Осиё мамлакатларига, хусусан, Ўзбекистонга электр энергияси сотиб олиш учун йилига 300 миллион долларга яқин пул тўлайди. «Афғонистон электр энергиясининг катта қисмини Ўзбекистондан сотиб олади. Йилига тахминан 108 миллион долларга. Энди муаммо ҳисоб-китобларни тўлашда», — дейди у. Омонулла Ғолиб, шунингдек, Украинадаги вазият қўшни давлатларнинг банк фаолиятини мураккаблаштирганини қўшимча қилган.
Ўзбекистон Энергетика вазирлиги матбуот хизматининг «Дарё» сўровига асосан маълум қилишича, Афғонистон томони 2021 йилдаги электр энергияси бўйича қарзини тўлиқ қоплаган. Афғон нашрида келтирилган қарздорлик суммаси ва 2022 йилда ушбу мамлакатнинг электр энергияси учун Ўзбекистондан қарздорлиги бор-йўқлиги ҳақидаги саволга изоҳ бермади.
Эслатиб ўтамиз, 2021 йилнинг октябрь ойида Афғонистон энергетика компаниясининг Ўзбекистон, Тожикистон, Туркманистон ва Эронга электр энергияси учун 51 миллион доллардан ортиқ қарзи борлиги хабар қилинган эди. Бироқ Ўзбекистон бош вазири ўринбосари Сардор Умурзоқовнинг сўзларига кўра, Афғонистон муваққат ҳукумати электр энергияси бўйича қарзини тўлиқ қоплаш мажбуриятини олган ва Ўзбекистон «бир соат ҳам» Кобулга электр энергияси етказиб беришни тўхтатмаган.
Изоҳ (0)