Toshkent shahri Mirzo Ulug‘bek tumanidagi masjidlardan birida o‘g‘rilik jinoyatini sodir etgan shaxs ishi bo‘yicha sud majlisi bo‘lib o‘tdi. Bu haqda Oliy sud xabar qildi.
Qayd etilishicha, ismi A. Sh. (23 yoshli) bo‘lgan xavfli retsidivist o‘zganing mol-mulkini yashirin ravishda talon-toroj qilish maqsadida 5-fevral kuni, taxminan, soat 16:00 da Qorasuv-6 mavzesida joylashgan “Oltintepa” masjidining tahorat qilish xonasiga kirgan. Xonada qoldirilgan fuqaro A.A.ga tegishli kostyumning cho‘ntagidagi 400 ming so‘m pul va narxi 1 million 300 ming so‘m bo‘lgan avtomashina qo‘riqlash pultini yashirin ravishda o‘g‘irlab, voqea joyidan yashiringan.
A.Sh. o‘zining jinoiy harakatlari bilan jabrlanuvchiga jami 1 million 700 ming so‘m miqdorida moddiy zarar yetkazgan.
Sud majlisi davomida u sodir etgan jinoyatiga iqror va pushaymonligini bildirgan. Jabrlanuvchi esa sudlanuvchiga nisbatan da’vosi yo‘qligini aytib, unga nisbatan jazo tayinlashni sudga havola qilishini bildirib, ko‘rsatuv bergan.
A.Sh. Jinoyat kodeksining 169-moddasi 3-qismi “a” bandida (takroran yoki xavfli retsidivist tomonidan o‘g‘irlik) nazarda tutilgan jinoyatni sodir etganlikda aybli deb topilib, muqaddam sudlangani va ishdagi dalillarga tayanib qonunda ko‘rsatilgan ozodlikdan mahrum qilish jazosini tayinlangan.
Izoh (0)