Тошкент шаҳри Мирзо Улуғбек туманидаги масжидлардан бирида ўғрилик жиноятини содир этган шахс иши бўйича суд мажлиси бўлиб ўтди. Бу ҳақда Олий суд хабар қилди.
Қайд этилишича, исми А. Ш. (23 ёшли) бўлган хавфли рецидивист ўзганинг мол-мулкини яширин равишда талон-торож қилиш мақсадида 5 февраль куни, тахминан, соат 16:00 да Қорасув-6 мавзесида жойлашган «Олтинтепа» масжидининг таҳорат қилиш хонасига кирган. Хонада қолдирилган фуқаро А.А.га тегишли костюмнинг чўнтагидаги 400 минг сўм пул ва нархи 1 миллион 300 минг сўм бўлган автомашина қўриқлаш пультини яширин равишда ўғирлаб, воқеа жойидан яширинган.
А.Ш. ўзининг жиноий ҳаракатлари билан жабрланувчига жами 1 миллион 700 минг сўм миқдорида моддий зарар етказган.
Суд мажлиси давомида у содир этган жиноятига иқрор ва пушаймонлигини билдирган. Жабрланувчи эса судланувчига нисбатан даъвоси йўқлигини айтиб, унга нисбатан жазо тайинлашни судга ҳавола қилишини билдириб, кўрсатув берган.
А.Ш. Жиноят кодексининг 169-моддаси 3-қисми «а» бандида (такроран ёки хавфли рецидивист томонидан ўғирлик) назарда тутилган жиноятни содир этганликда айбли деб топилиб, муқаддам судлангани ва ишдаги далилларга таяниб қонунда кўрсатилган озодликдан маҳрум қилиш жазосини тайинланган.
Изоҳ (0)