10-may kuni Ashxobodda Turkmaniston Milliy olimpiya qo‘mitasi (MOQ) Bosh assambleyasi majlisi bo‘lib o‘tdi, unda davlat rahbari Serdar Berdimuhamedov bir ovozdan tashkilot prezidenti etib saylandi, deb xabar beradi “Xronika Turkmenistana”.
Ushbu lavozimda Serdar Berdimuhamedov mamlakat sobiq prezidenti, endilikda Xalq Maslahati raisi Gurbanguli Berdimuhamedovning o‘rnini egalladi, u MOQga 2007-yildan buyon rahbarlik qilib kelgandi.
Turkmaniston MOQga 1990-yilda asos solingan, 1993-yilda Xalqaro olimpiya qo‘mitasi tomonidan ro‘yxatga olingan.
Nashr eslatishicha, 28-aprel kuni Turkmaniston milliy terma jamoalarini 2024-yil Parijda bo‘lib o‘tadigan XXXIII yozgi Olimpiya o‘yinlari va XVII Paralimpiya o‘yinlariga tayyorlash bo‘yicha tashkiliy qo‘mita tuzilgandi.
Qayd etilishicha, Serdar Berdimuhamedov Turkmanistonda xizmat ko‘rsatgan sport murabbiyi ham hisoblanadi. Ushbu unvon unga 2017-yilda “Turkmanistonning sport davlati sifatidagi xalqaro nufuzini oshirganligi hamda Yopiq inshootlar va jang san’ati bo‘yicha V Osiyo o‘yinlarida sovrinli o‘rinlarni egallagan sportchilarni tayyorlashgan shaxsan hissa qo‘shganligi uchun” berilgan.
Eslatib o‘tamiz, Turkmaniston prezidenti sifatida 2007-yildan buyon ishlab kelgan Gurbanguli Berdimuhamedov 11-fevral kuni hukumatni yosh avlodga topshirishga qaror qilganini, o‘zi esa parlament yuqori palatasi raisi bo‘lib qolishini ma’lum qilgandi.
Oradan bir oy o‘tib, 12-mart kuni mamlakatda prezidentlik saylovlari bo‘lib o‘tdi. Unda amaldagi davlat rahbarining o‘g‘li Serdar Berdimuhamedov g‘olib bo‘ldi. Saylov kampaniyasi davomida u Turkmanistonning neytral maqomini saqlab qolish, shuningdek, yaxshi qo‘shnichilik munosabatlarini rivojlantirish va xalqaro tashkilotlar, xususan, BMT bilan hamkorlikni mustahkamlashga va’da bergan.
Ovoz berish natijalariga ko‘ra, u 72,97 foiz ovoz olgan. Uni saylovdagi g‘alabasi bilan bir qancha davlat rahbarlari, jumladan, O‘zbekiston prezidenti Shavkat Mirziyoyev tabrikladi. 19-mart kuni yangi saylangan prezidentning inauguratsiya marosimi bo‘lib o‘tdi.
Mavzuga doir:
- Turkmanistonda laylatul qadr kechasi munosabati bilan 514 nafar mahkum afv etildi
- Gurbanguli Berdimuhamedov Turkiy davlatlar tashkiloti Oqsoqollar kengashi a’zosiga aylandi
- Gurbanguli Berdimuhamedov Turkmanistonning yangi prezidentidan ta’til so‘radi
- Jo Bayden Serdar Berdimuhamedovni Navro‘z bilan qutladi. Biroq uni Turkmaniston prezidenti etib saylangani bilan tabriklamagan
Izoh (0)