Italiya Senati, Mudofaa vazirligi va boshqa bir qancha muassasalar saytlari xakerlar hujumiga uchradi. Bu haqda ANSA agentligi va Il Messaggero gazetasi xabar bermoqda.
Nashrlar xabariga ko‘ra, 11-may oqshomida sodir bo‘lgan kiberhujum uchun javobgarlikni Rossiyaga aloqador bo‘lgan Killnet guruhining xakerlari o‘z zimmasiga olgan. “Italiyaga hujum” haqidagi bayonot xakerlarning Telegram-kanalida e’lon qilingan.
Reuters xabariga ko‘ra, Italiya Senati va Sog‘liqni saqlash instituti saytlari taxminan bir soat davomida ishlamagan, keyin qayta ishga tushgan.
Senat spikeri Mariya Elizabetta Kazellati, hujum hech qanday zarar keltirmaganini bildirdi. Shu bilan birga, u voqeaning jiddiyligini ta’kidlab, buni e’tibordan chetda qoldirmaslik lozimligini aytdi. O‘z navbatida, Italiya Mudofaa vazirligi idora veb-saytiga kirish “anchadan beri rejalashtirilgan texnik ishlar tufayli” vaqtincha cheklanganini ma’lum qildi.
Izoh (0)