Shimoliy Koreyada koronavirus bilan kasallanish bo‘yicha birinchi holat qayd etildi, deb xabar bermoqda Yonhap Koreya Markaziy telegraf agentligiga tayanib.
Agentlik ma’lumotlariga ko‘ra, 8-may kuni Pxenyandagi bemorlardan test olingan, natijalar omikron shtammi bilan kasallanish holatini ko‘rsatgan.
Shundan so‘ng respublika hukumati “maksimal favqulodda vaziyat” uchun virusni nazorat qilish tizimi joriy etilishini e’lon qildi. Keyin Shimoliy Koreya yetakchisi Kim Chen In Siyosiy byuro yig‘ilishini o‘tkazib, virus tarqalishining oldini olish uchun barcha choralarni ko‘rishga va chegara nazoratini kuchaytirishga chaqirdi.
Janubiy Koreya prezidenti ma’muriyati Shimoliy Koreya hukumatiga COVID-19 ga qarshi kurashda gumanitar yordam ko‘rsatishga tayyorligini ma’lum qildi, deb xabar bermoqda Reuters.
Pandemiya boshlanganidan beri Pxenyan biror marta mamlakatda koronavirusga chalinish holatlari haqida rasman xabar bermagan. Biroq 2020-yil iyul oyida Markaziy telegraf agentligi mamlakatda COVID-19 borligi taxmin qilinayotgani haqida xabar berdi. Agentlik ma’lumotlariga ko‘ra, virusni yuqtirganlar KXDR chegarasini “noqonuniy ravishda kesib o‘tgan” bo‘lishi mumkin. Shundan so‘ng Kim Chen In hukmron Ishchilar partiyasi Siyosiy byurosining favqulodda yig‘ilishini chaqirgan. Kasallangan odam bilan aloqada bo‘lganlarning barchasi karantinga olingan.
Virus kirib kelishining oldini olish maqsadida 2020-yil yanvar oyida Shimoliy Koreya hukumati xorijliklar va o‘z fuqarolari uchun quruqlik, dengiz va havo chegaralarini yopdi, shuningdek, mamlakat ichida harakatlanishga qattiq cheklovlar kiritdi. O‘sha yilning fevral oyidan qator davlatlarning elchixonalari yopila boshladi, diplomatlar mamlakatni tark etdi. Bundan tashqari, dunyoda COVID-19 bilan bog‘liq vaziyat tufayli KXDR 2021-yilda Tokioda bo‘lib o‘tgan Yozgi Olimpiya o‘yinlarida ishtirok etishdan bosh tortdi.
2021-yil oktabr oyida Jahon sog‘liqni saqlash tashkiloti (JSST) mamlakatga COVID-19 ga qarshi dori vositalari yetkazib berishni boshladi. Koronavirusga qarshi vaksinalarga kelsak, 2021-yili GAVI xalqaro assotsiatsiyasi (BMT, JSST, UNICEF va boshqa xalqaro institutlar tomonidan qo‘llab-quvvatlangan alyans) KXDRga 1,7 million doza vaksina yetkazib berishni rejalashtirgan edi. Biroq Pxenyan dorilarning samaradorligiga shubha bilan qaradi, nojo‘ya ta’sirlar uchun javobgarlikdan voz kechish to‘g‘risidagi hujjatni imzolamadi va GAVI xodimlarini mamlakatga kiritishni istamadi. 2021-yil iyul oyida “Amerika Ovozi” manbalarga tayanib, vaksina bo‘yicha muzokaralar Shimoliy Koreya kelishuvga rioya qilmagani sababli to‘xtab qolganini xabar qildi.
Izoh (0)