Сердар Бердимуҳамедов Туркманистон МОҚ президенти лавозимида отасининг ўрнини эгаллади

10 май куни Ашхободда Туркманистон Миллий олимпия қўмитаси (МОҚ) Бош ассамблеяси мажлиси бўлиб ўтди, унда давлат раҳбари Сердар Бердимуҳамедов бир овоздан ташкилот президенти этиб сайланди, деб хабар беради «Хроника Туркменистана».

Ушбу лавозимда Сердар Бердимуҳамедов мамлакат собиқ президенти, эндиликда Халқ Маслаҳати раиси Гурбангули Бердимуҳамедовнинг ўрнини эгаллади, у МОҚга 2007 йилдан буён раҳбарлик қилиб келганди.

Туркманистон МОҚга 1990 йилда асос солинган, 1993 йилда Халқаро олимпия қўмитаси томонидан рўйхатга олинган.

Нашр эслатишича, 28 апрель куни Туркманистон миллий терма жамоаларини 2024 йил Парижда бўлиб ўтадиган ХХХИИИ ёзги Олимпия ўйинлари ва XVII Паралимпия ўйинларига тайёрлаш бўйича ташкилий қўмита тузилганди.

Қайд этилишича, Сердар Бердимуҳамедов Туркманистонда хизмат кўрсатган спорт мураббийи ҳам ҳисобланади. Ушбу унвон унга 2017 йилда «Туркманистоннинг спорт давлати сифатидаги халқаро нуфузини оширганлиги ҳамда Ёпиқ иншоотлар ва жанг санъати бўйича V Осиё ўйинларида совринли ўринларни эгаллаган спортчиларни тайёрлашган шахсан ҳисса қўшганлиги учун» берилган.

Эслатиб ўтамиз, Туркманистон президенти сифатида 2007 йилдан буён ишлаб келган Гурбангули Бердимуҳамедов 11 февраль куни ҳукуматни ёш авлодга топширишга қарор қилганини, ўзи эса парламент юқори палатаси раиси бўлиб қолишини маълум қилганди.

Орадан бир ой ўтиб, 12 март куни мамлакатда президентлик сайловлари бўлиб ўтди. Унда амалдаги давлат раҳбарининг ўғли Сердар Бердимуҳамедов ғолиб бўлди. Сайлов кампанияси давомида у Туркманистоннинг нейтрал мақомини сақлаб қолиш, шунингдек, яхши қўшничилик муносабатларини ривожлантириш ва халқаро ташкилотлар, хусусан, БМТ билан ҳамкорликни мустаҳкамлашга ваъда берган.

Овоз бериш натижаларига кўра, у 72,97 фоиз овоз олган. Уни сайловдаги ғалабаси билан бир қанча давлат раҳбарлари, жумладан, Ўзбекистон президенти Шавкат Мирзиёев табриклади. 19 март куни янги сайланган президентнинг инаугурация маросими бўлиб ўтди.