Rossiya kuchlarining Ukrainadagi harakatlari o‘ta og‘ir oqibatlarga olib kelishi, janglarni to‘xtatish zarur deya ta’kidlagan Fransiya prezidenti Emmanuel Makron rossiyalik hamkasbi Vladimir Putin bilan telefon suhbatida. Bu haqda Yelisey saroyi xabar qilgan.
“Makron Mariupol hamda Donbassdagi vaziyatdan xavotirda ekanligini aytdi va Rossiyadan so‘nggi kunlarda “Azovstal” zavodidagi odamlarni evakuatsiya qilish ishlarini davom ettirishga ruxsat berishni so‘radi”, — deyiladi xabarda.
Parij vakolatli xalqaro tashkilotlar bilan hamkorlikda Rossiyaning Ukraina oziq-ovqat mahsulotlarini Qora dengiz orqali eksport qilinishiga nisbatan taqiqini olib tashlashga harakat qiladi, Fransiya mazkur bloklash butun dunyoda oziq-ovqat iqirozini yuzaga keltirishi mumkinligidan xavotirda.
Putin va Makronning suhbati ikki soat o‘n daqiqa davom etgan, deya xabar bergan BFM jurnalisti Patrik Sos.
Mart oxirida Makron dunyo miqyosida oziq-ovqat inqirozi bo‘lishining ehtimoli yuqori ekanligi haqida ogohlantirgan, AQSH prezidenti Jo Bayden uning ushbu taxminiga qo‘shilishini aytgandi. Fransiya prezidentining so‘zlariga ko‘ra Ukrainadagi harbiy harakatlar sabab bug‘doy import qiladigan davlatlar 1 – 1,5 yil ichida og‘ir qiyinchiliklarda duch kelishi mumkin. May boshida Germaniya kansleri Olaf Sholts don xarid qila olmaydigan mamlakatlardagi ocharchilik muammosini hal etishga yordam berishini bildirgan.
Ukrainadan don yetkazib berilmayotgani yuzasidan Butunjahon savdo tashkiloti ham xavotirda.
“Kelgusi yillarda oziq-ovqat mahsulotlari narxining o‘zgarishi va ocharchilik muammosi jiddiy bo‘ladi. Oziq-ovqat va energiya — butun dunyodagi qashshoqlar iste’mol savatidagi eng katta ikki predmet hisoblanadi”, — deya qayd etgan BST bosh direktori Ngozi Okonjo-Iveala.
BMT may boshida Ukraina portida taxminan 4,5 mln tonna don yig‘ilib qolgani va uni olib chiqib ketishning imkoni bo‘lmayotganini ma’lum qilgan.
Izoh (0)