“Fulhem” Angliya ikkinchi divizioni chempioniga aylandi va “Manchester Siti”ning natijasini takrorladi

“Fulhem” Chempionshipning 45-turida “Luton” ustidan 7:0 hisobida g‘alaba qozondi va musobaqa chempionligini qo‘lga kiritdi.

Londonliklar ikkinchi o‘rindagi “Bornmut” bilan oradagi farqni 8 ochkoga yetkazdi.

“Luton” darvozasiga urilgan gollardan biriga Aleksandr Mitrovich mualliflik qildi. Hujumchi hisobida ushbu mavsum 43 ta o‘yinda 43 ta gol mavjud.

27 yoshli serb 1992-yil APL tashkil topgandan buyon Angliyaning ikkinchi divizionida 43 ta gol urgan ilk futbolchiga aylandi. Shuningdek, Mitrovichning hisobida 7 ta golli uzatma bor.

“Fulhem” Chempionship joriy mavsumi 45 ta o‘yinida 106 ta gol urdi va bir mavsum davomida yuzlik dovondan o‘tgan “Machester Siti”dan keyingi ilk klub bo‘ldi. “Shaharliklar” 2001/02-yilgi mavsumda 108 ta gol urgandi.