Angliya chempionatining 35-turida “Manchester Yunayted” “Brentford” ustidan 3:0 hisobida g‘alaba qozondi.
Uchrashuvda Krishtianu Ronaldu penaltidan gol urdi. Shu tariqa “Brentford” portugaliyalik hujumchi gol urgan 168-jamoaga aylandi.
Ronaldu mankunianliklar safida so‘nggi 4 o‘yinda 6 ta gol urishga muvaffaq bo‘ldi. Avvalroq Krishtianu “Norvich” (3:2), “Arsenal” (1:3) va “Chelsi”ga (1:1) qarshi bahslarda o‘z hisobiga gol yozdirib qo‘ygandi.
Shuningdek, Ronaldu “qizil iblislar”ning APLdagi oxirgi 11 golidan 9 tasiga mualliflik qildi. 12-martdan buyon portugaliyalik futbolchi “Tottenhem” (3:2) va “Norvich” (3:2) darvozasiga 3 tadan gol urdi, “Arsenal”ga (1:3) qarshi o‘yinda ham raqib darvozasini ishg‘ol qildi. “Chelsi”ga (1:1) qarshi bahsda esa Ronalduning goli manchesterliklarga durang natija olib kelgandi.
Krishtianu APL joriy mavsumidagi gollari sonini 18 taga yetkazib oldi va “Manchester Yunayted”dagi so‘nggi mavsumida (2008/09, 18 ta gol) qayd etgan natijasini takrorladi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)