UEFA Rossiya terma jamoalari va klublarini Yevrokubok musobaqalaridan chetlatdi.
Tashkilot Rossiya terma jamoasi va klublarining maqomi, shuningdek, ularning tashkilot tasarrufidagi musobaqalarida ishtirok etish masalasini ko‘rib chiqishni rejalashtirayotgani xabar qilingandi.
Unga ko‘ra, RPL jamoalari 2022/23-yilgi mavsum Chempionlar Ligasi, Yevropa Ligasi va Konferensiyalar Ligasida ishtirok etmaydi. Bu ayollar o‘rtasidagi Chempionlar Ligasi va UEFA yoshlar ligasiga ham tegishli.
Shuningdek, yangi mavsumda Rossiya mini-futbol klublari ham UEFA tasarrufidagi musobaqalarda ishtirok eta olmaydi.
Rossiya terma jamoasi Millatlar Ligasidan chetlatildi. Terma jamoa avtomatik tarzda B liganing 2-guruhida oxirgi o‘ringa tushirib yuboriladi.
Rossiya ayollar terma jamoasi esa Yevro—2022 ni o‘tkazib yuboradi (uning o‘rnini Portugaliya egallaydi) va JCh—2023 saralash bosqichida qatnashmaydi. Avvalgi natijalar bekor qilinadi.
Rossiya yoshlar terma jamoasi Yevro—2023 saralash bosqichida ishtirok etishdan chetlatildi.
Eslatib o‘tamiz, 28-fevral kuni FIFA va UEFA Ukrainadagi vaziyat tufayli Rossiya terma jamoalari va Rossiya klublarini barcha xalqaro musobaqalarda ishtirok etishdan chetlatdi. Rossiya terma jamoasi esa xalqaro musobaqalardan chetlatilgani munosabati bilan uning o‘rniga Polsha JCh—2022 saralashi pley-offining finalida o‘ynashi xabar qilingandi.
Izoh (0)