O‘zbekistonda “Soliq hamkor” orqali murojaat yuborilgan 10 205 ta holatda 5,7 milliard so‘m mukofot puli to‘langan. Bu haqda AOKAda Davlat soliq qo‘mitasi raisi o‘rinbosari va mutasaddilari ishtirokida o‘tkazilgan matbuot anjumanida ma’lum qilindi.
Fuqarolar 2022-yil 1-yanvardan boshlab “Soliq hamkor” tizimi orqali quyidagi holatlar yuzasidan xabar berganda huquqbuzarlardan undirilgan jarimaning 20 foizi miqdorida mukofotlanmoqda:
- nazorat kassa texnikasi va to‘lov terminallarini qo‘llash tartibini buzganlik;
- noqonuniy tadbirkorlik faoliyati;
- to‘lov terminallari orqali sotiladigan tovarlarning narxni sun’iy oshirish holatlari.
Yil boshidan buyon kelib tushgan jami murojaatlarning 19 061 tasi takroran yuborilgani sababli rad etilgan, 1 981 tasi tekshiruv jarayonida. Bugungi kunda murojaatlarning 25 283 tasi o‘rganilgan va ularning 98 foizi (24 637 tasi) o‘z tasdig‘ini topgan. 646 ta murojaatda qayd etilgan huquqbuzarlik tasdiqlanmagan.
“Soliq hamkor” orqali murojaat yuborgan fuqarolarning 10 205 nafariga 5,7 milliard so‘m mukofot to‘lab berilgan.
Avvalroq O‘zbekistonda iste’molchilarga yil boshidan buyon 68 milliard so‘m keshbek to‘langani, Buxoroda xarid chekini bermagan savdogar bu haqda soliqchilarga xabar qilgan xaridorni kaltaklangani to‘g‘risida xabar berilgandi.
Izoh (0)