“O‘zbekistonda firibgarlik so‘nggi 4 yilda 4 baravarga, kiberfiribgarlik so‘nggi 3 yilda 8,3 baravarga ko‘paygan” — adliya vaziri

O‘zbekistonda firibgarlik so‘nggi 4 yilda 4 baravarga (2018-yilda 6483 ta, 2019-yilda, 6321 ta, 2020-yilda 10 ming 496 ta, 2021-yilda 24 ming 554 ta) ko‘paygan. Bu haqda adliya vaziri Ruslanbek Davletov 28-aprel kuni Senatning yigirma beshinchi yalpi majlisida aytib o‘tdi, deb xabar bermoqda “Daryo” muxbiri.

Ruslanbek Davletovning aytishicha, bugungi kunda aholi hayotida qanday huquqiy munosabatlarda muammolar bo‘layotganligini tahlil qilib borish, shunga qarata aniq va manzilli ishlash lozim.

“Masalan, firibgarlik, kiberfiribgarlik hozir avj olyapti. Yangi moliyaviy piramidalar paydo bo‘lyapti. Fuqarolarimiz qimor va boshqa tavakkalchilikka asoslangan o‘yinlar uchun jinoiy javobgarlik borligini bilib turib ham bu yo‘ldan qaytmayapti. O‘zbekistonda firibgarlik so‘nggi 4 yilda 4 baravarga, (2018-yilda 6483 ta, 2019-yilda, 6321 ta, 2020-yilda 10 ming 496 ta, 2021-yilda 24 ming 554 ta), kiberfiribgarlik esa so‘nggi 3 yilda 8,3 baravarga ko‘payib, hozirda umumiy jinoyatchilikning qariyb 5 foiziga yetgan”, — deydi u.

Adliya vazirini ta’kidlashicha, aholida firibgarlik, kiberfiribgarlikka qarshi “immunitet” paydo qilish kerak.

“Aldanib qolmaslik uchun kerakli ma’lumotni yetkazishimiz, oson daromad topish ilinjida tuzoqqa tushib qolmaslik choralarini ko‘rishimiz kerak. Ikkinchi tomondan, davlat organlari hushyor bo‘lib, firibgarlik holatlarining oldini olib borishi zarur. Yaqindagi bitta xususiy klinika atrofidagi holatlarda, davlat bu klinikaga litsenziya bergan, qonuniy ishlashiga ishonch bildirilgan, mana endi butun xalqni aldagani ma’lum bo‘lyapti. Jinoyatchilar javobgarlikka tortilib zararni to‘liq qoplamasdan bir oz muddat ozodlikdan mahrum qilinib, yana ozodlikka chiqishi kuzatilishi mumkinki, bu ham aholida salbiy kayfiyatni paydo qilishi mumkin”, — deydi u.

Adliya vaziri, shuningdek, jamiyatda “samosud” holatlari huquqiy ongga teskari ishlaydigan holat ekanligini aytdi.

“Oxirgi paytlarda bu holatlar ham oshib bormoqda. ‘Samosud’ balki o‘sha zahoti kimningdir qonga to‘lgan ko‘zlarini yoki kuzatib turganlarning instinktini va ehtiyojini qondirar, lekin uzoq istiqbolda erkin jamiyat qurishga katta to‘siq bo‘ladi, odamlarning adolatli va xavfsiz sharoitda yashashga ishonchini so‘ndiradi. Shuning uchun bu boradagi targ‘ibot va tashviqotni kuchaytirib, ‘samosud’ holatlariga qarshi kurashishimiz lozim”, — deya qo‘shimcha qiladi Ruslanbek Davletov.